Між Беларуссю і Расіяй наспявае спрэчка за мыты. Масква кажа пра запазычанасць Мінска
Мытны камітэт Беларусі адказаў на «даўгі» кіраўніка мытнай службы Расіі.
У Дзяржаўным мытным камітэце Беларусі называюць заяву кіраўніка Федэральнай мытнай службы Расіі Андрэя Бельянінава аб беларускім доўгу ў рамках Мытнага саюза «некарэктнай, якая ігнаруе заканадаўства Мытнага саюза, у распрацоўцы якога Бельянінаў А.Ю. браў непасрэдны ўдзел».
Нагадаем, кіраўнік ФМС Расіі заявіў аб тым, што Беларусь вінаватая Расіі больш чым 6,3 млрд расійскіх рублёў (225 мільёнаў даляраў) праз «нездавальняючае адміністраванне ўвазных мытаў».
У ДМК Беларусі заяўляюць, што «сцверджанне аб тым, што адміністраванне ўвазных мытаў у Беларусь і Казахстан нездавальняючае, не адпавядае рэчаіснасці». «Высокі ўзровень развіцця мытнага адміністравання ў Беларусі адзначаны місіяй мытных экспертаў Еўрапейскага саюза. Па дадзеным кірунку Беларусь знаходзіцца вышэй за Расійскую Федэрацыю згодна з рэйтынгам Сусветнага банка», гаворыцца ў паведамленні ДМК.
У ДМК нагадалі, што каэфіцыенты размеркавання ўвазных мытаў, якія збіраюцца ў Мытным саюзе, акрэслены Пагадненнем аб усталяванні і прымяненні ў МС парадку залічэння і размеркавання ўвазных мытаў (іншых мытаў, падаткаў і збораў, якія маюць эквівалентнае дзеянне) у памерах: Рэспубліка Беларусь — 4,70%; Рэспубліка Казахстан — 7,33%; Расійская Федэрацыя — 87,97%. «Гэтыя каэфіцыенты вызначаліся па методыцы, зацверджанай рашэннем Камісіі Мытнага саюза ў адпаведнасці з існымі рэаліямі таго часу», падкрэсліваюць у ДМК.
«Дыспарытэт сустрэчных патокаў увазных мытаў у рамках іх размеркавання ў цяперашні час абумоўлены ростам імпарту ў Расію і наступным ператокам гэтых тавараў у Беларусь, у той час як мыты па іх выплачаныя ў РФ», — гаворыць заява ДМК Беларусі.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2323
Каментары