Амерыканцы прыдумалі наватарскі спосаб лекавання раку
Сутнасць эксперыментальнага метаду, выкарыстанага навукоўцамі, заключаецца ў генетычным «перапраграмаванні» Т-лімфацытаў.
Група амерыканскіх даследчыкаў паспяхова выкарыстала генную тэрапію для лячэння хранічнага лімфалейкозу — анкалагічнага захворвання, звязанага з некантраляваным размнажэннем атыповых B-лімфацытаў,
паведамляюць інфармагенцтвы.
Эксперыментальнае лячэнне было апрабаванае на трох пацыентах з познімі стадыямі захворвання. Сутнасць эксперыментальнага метаду, выкарыстанага навукоўцамі, заключаецца ў генетычным «перапраграмаванні» Т-лімфацытаў пацыентаў, пасля якога гэтыя клеткі набываюць здольнасць распазнаваць і знішчаць клеткі злаякаснай пухліны.
З гэтай мэтай T-лімфацыты былі выдзеленыя з крыві хворых і размножаныя ў лабараторыі. Пасля гэтага ў геном клетак з дапамогай бясшкоднага для чалавека віруса былі ўнесеныя гены, што кадзіруюць хімернае антыцела, здольнае звязвацца з антыгенам CD19. Гэты антыген сустракаецца толькі на паверхні атыповых клетак, якія некантралявана размнажаюцца пры хранічным лімфалейкозе.
Эксперыментальнае лячэнне было апрабаванае на трох пацыентах з познімі стадыямі захворвання, якім з розных прычынаў ужо не дапамагала хіміятэрапія. Увядзенне мадыфікаваных клетак у арганізм ажыццяўлялася ў тры этапы цягам трох дзён. Праз два-тры тыдні пасля гэтага ў хворых былі адзначаныя прыкметы масавай гібелі пухлінавых клетак, гэты працэс суправаджаўся павышэннем тэмпературы цела, дрыжыкамі і млоснасцю, якія доўжыліся некалькіх дзён.
Эфектыўнасць лячэння пацвярджалася зніжэннем колькасці або поўным знікненнем клетак пухліны ў касцявым мозгу, крыві і лімфатычнай тканцы пацыентаў. Пры гэтым мадыфікаваныя Т-клеткі захоўвалі актыўнасць, працягваючы размножвацца і знішчаць клеткі пухліны яшчэ некалькі месяцаў пасля пачатку лячэння. Двум з трох хворых удалося дасягнуць устойлівай рэмісіі, стан трэцяга хворага таксама значна палепшыўся ў выніку лячэння.
Каментары