КДК бярэ пад кантроль постдажынкавыя Горкі. Кіраўніцтва горада: так, дробныя хібы

У Горках якасць выканання будаўнічых і рамонтных работ прыцягнула ўвагу Камітэта дзяржкантролю, паведаміў намеснік старшыні Горацкага райвыканкама Уладзіслаў Яромін.

Нагадаем, 21–22 верасня ў Горках прайшоў фестываль работнікаў сяла «Дажынкі-2012». Яго правядзенню папярэднічала традыцыйна маштабная ў такіх выпадках рэканструкцыя горада, які прымае фестываль. Аднак ужо пасля «Дажынак» у інтэрнэт-СМІ з’явіліся шматлікія фатаграфіі, на якіх відаць, што новыя пешаходныя дарожкі, дзе была выкладзена плітка, не вытрымалі выпрабавання дажджамі і разбурыліся. Таксама былі апублікаваны і іншыя здымкі шматлікіх недаробак і будаўнічага браку. У канцы мінулага тыдня шэраг СМІ паведамілі, што Аляксандр Лукашэнка на сустрэчы з прэм’ер-міністрам Міхаілам Мясніковічам у рэзкай форме раскрытыкаваў якасць рамонту ў Горках і запатрабаваў ліквідаваць недаробкі і брак.

Паводле слоў Яроміна, ёсць праблема з амфітэатрам, у якім праходзіла ўрачыстая частка «Дажынак». «Дзесьці парушылі гідраізаляцыю. Ідзе падцяканне па сценцы», — сказаў чыноўнік.

Як паведаміла БелаПАН рэдактар горацкай газеты «Узгорак» Галіна Будная, у многіх дамах, дзе мянялі дах, на працягу некалькіх месяцаў дажджы залівалі кватэры верхніх паверхаў.

Цяпер многія з гэтых кватэр адрамантаваны, праблема засталася «ў двух-трох дамах» з-за маруднай працы магілёўскіх падрадных арганізацый, паведаміў Яромін. Паводле яго слоў, праблема «зацякання дажджавых вод» у кватэры таксама цяпер у цэнтры ўвагі Камітэта дзяржкантролю.

Паводле інфармацыі Буднай, пасля правядзення «Дажынак» дарожкі, выкладзеныя пліткай, у шэрагу месцаў сталі разбурацца. «Людзі тэлефанавалі, паведамлялі пра гэтыя выпадкі. На працягу дзён дзесяці — тыдня гэтыя недахопы з пліткай былі ўстаронены. Усё назад паклалі. Але ўсё адно ў розных месцах з’яўляюцца невялікія правальванні ці ўзнімаецца плітка. Я думаю, гэта некаторы час будзе працягвацца, пакуль усё канчаткова не ўсядзецца, не ўляжацца», — сказала Будная.

Праблему з дарожнай пліткай пацвердзіў і Уладзіслаў Яромін, адзначыўшы, што гэта адбылося ў чатырох месцах, дзе з-за моцнага патоку вады была вымыта аснова дарожкі.

«Плітку пераклалі адразу ж. Але гэта ж не брак», — сцвярджае чыноўнік.

«Ёсць вуліцы, жыхарам якіх абяцалі пакласці асфальт менавіта да гэтага свята. Сёння дзве жыхаркі горада расказалі, што не ўсім паклалі асфальт, каму абяцалі», — сказала Будная. У прыватнасці, паводле яе слоў, не быў пакладзены асфальт на адной з вуліц у раёне малаказавода.

«Рабілі каналізацыю, не дарабілі. Калодзежы стаяць незакрытыя. Гэтыя калодзежы выступаюць над узроўнем вуліцы.

Яромін паведаміў, што яму нічога не вядома пра незакрытыя калодзежы, за выключэннем тых, адкуль люкі былі выкрадзены зламыснікамі.

Паводле яго слоў, на асфальтаванне перыферыйных вуліц выдзелена 15 млрд. рублёў.

Што датычыцца інфармацыі пра цвіль у адным з інтэрнатаў Беларускай дзяржаўнай сельскагаспадарчай акадэміі, то, як адзначыў Яромін, яму пра гэта нічога не вядома, паколькі са скаргамі ў райвыканкам па гэтым пытанні ніхто не звяртаўся.

• 0
• 0
• 0
• 0
• 0
• 0
• 0
• 0