працяг тэмы
Адзінае, што нам патрэбна ў Маскве
Гатэль “Масква”, дзе загінуў Янка Купала, хутка зьнясуць. На яго месцы маскоўская мэрыя вырашыла паставіць новы, з выгляду гэткі самы. Але інтэр’ер новай “Масквы” будзе цалкам іншы. Зьнікнуць апошнія “матэрыяльныя сьведкі” Купалавае сьмерці — нумар, дзе ён жыў, лесьвіца, па якой ішоў, пліты, на якія ўпаў.
Жанна Дапкюнас, дырэктарка музэю Янкі Купалы, у камэнтары для “НН” зазначыла: “Трэба захаваць і гэтую, ня самую лепшую старонку гісторыі. Пагатоў што захаваліся і пліты, і тыя дзьверы, зь якіх Купала апошні раз выйшаў. Трэба было б усё гэта вывезьці, бо ў Маскве пра захаваньне ніхто клапаціцца ня будзе. А ў нас можна паставіць хоць бы ў экспазыцыі музэю: гэта быў бы трагічны і разбуральны вобраз... 4—5 ліпеня ў музэі адбудзецца канфэрэнцыя, на якую прыедзе з Масквы Аляксей Каўка. Пагаворым зь ім: яму на месцы, у Маскве, будзе прасьцей нешта арганізаваць”.
Беларускаму грамадзтву выратаваць пліты зь месца Купалавае гібелі прасьцей, чым перавезьці парэшткі з магілы Багдановіча. Толькі рабіць гэта трэба неадкладна: сабраць грошы, дамовіцца з маскоўскай мэрыяй… Змарнаваны час — змарнаваныя магчымасьці. У год, калі адзначаюцца 120-я ўгодкі з дня нараджэньня паэта, зьнішчэньне гатэлю, дзе сканаў Купала, набывае проста сымбалічную значнасьць.
“НН” будзе інфармаваць чытачоў пра тое, як рухаецца справа.
А. Ш.
“Маскву” спраектаваў архітэктар Шчусеў у 1935 г. Гэта быў першы гатэль, узьведзены за саветамі. Да яго будаўніцтва спрычыніўся й “вялікі сябра архітэктараў”. Калі Сталіну прынесьлі на выбар два варыянты фасаду, намаляваныя на адным аркушы ватману, ён зацьвердзіў праект, падпісаўшыся між рысункамі. Перапытваць не наважыліся: давялося рабіць адну палову фасаду паводле аднаго праекту, а другую — згодна з другім.
Каментары