Жыцьцё для Ясьмін
18-гадовы жыхар Глазга, студэнт мэдыцыны Джонатан Джэснэр стаў адной з шасьці ахвяраў тэракту ў Тэль-Авіве 19 верасьня. Адказнасьць за акцыю палестынца-камікадзэ ўзяў на сябе “Хамас”. Ёні Джэснэр атрымаў сьмяротную траўму галавы. Дактары яшчэ дзень змагаліся за ягонае жыцьцё, ды марна — хлопец сканаў у тэль-авіўскім шпіталі Ічылаў.
Але сьмерць Джонатана ня сталася чарговым каменем у муры між арабамі й жыдамі, які ўзводзіўся з часу аднаўленьня Ізраілю. Наадварот — яна можа стацца пачаткам ягонага разбурэньня. Бо нырка Джонатана была перасаджаная сямігадовай арабскай дзяўчынцы Ясьмін Абу Раміле з Усходняга Ерусаліму, што пакутуе на прыроджаны дэфэкт гэтага органу. Дзяўчынка два гады чакала на прыдатную нырку. Перасадка прайшла пасьпяхова. “Я ня ведаю, як аддзячыць сям’і, пацярпелай ад выбуху. Яны падаравалі жыцьцё маёй дачцэ”, — кажа Рына, маці Ясьмін. Дзядуля дзяўчынкі Фарук дадае: “Нырка ўзятая ад жыда, але цяпер гэта назаўжды частка яе самой. Мы спадзяёмся, што Ясьмін акрыяе і здолее сустрэцца зь сям’ёй Ёні”.
Джонатан прыехаў у Ізраіль на год павучыцца ў ешыбоце Гуш Эцыён. Для гэтага ён адклаў на год сканчэньне мэдычнай вучэльні ў Глазга. Ён марыў, давучыўшыся ў Шатляндыі, назаўжды пераехаць у Ізраіль. Хлопец кіраваў жыдоўскай моладзевай дэлегацыяй пры шатляндзкім парлямэнце. На прэсавай канфэрэнцыі ягоны брат Ары Джэснэр заявіў, што Ёні быў бы шчасьлівы даведацца, што некаму дапамог нават пасьля сьмерці.
Цяпер чытаюць
Герой Беларусі Марына Васілеўская нарадзіла дачку ад касманаўта Алега Навіцкага26
Каментары