На мiнулым тыднi дэпутаты Палаты прадстаўнiкоў Нацыянальнага сходу на сесіі адобрылі законапраект, якi ўхваляе ўнясенне змяненняў i дапаўненняў у Пагадненне памiж урадамi Лiтвы i Беларусi аб пунктах пропуску праз дзяржаўную мяжу.
Лiтоўскi i беларускi бакi пагадзiлiся, што памiж дзвюма дзяржавамi будуць iснаваць толькi два мiжнародныя чыгуначныя пункты пропуску: Кена (Лiтва) — Гудагай (Беларусь) i Стасiлас — Беняконi.
Мiжнародных аўтадарожных пунктаў пропуску будзе чатыры: Лаварышкес (Лiтва) — Катлоўка (Беларусь), Мядзiнiнкай — Каменны Лог, Шальчынiнкай — Беняконi, Райгардас — Прывалка.
Таксама будзе iснаваць адзiн мiжнародны рачны пункт пропуску Швяндубрэ (Лiтва) — Прывалка (Беларусь). Гэты сезонны пункт, як адзначаецца ў Пагадненнi, будзе адкрыты «для пропуску асобаў незалежна ад iх грамадзянства, якiя перасякаюць дзяржаўную мяжу ў беставарных пасажырскiх зносiнах з выкарыстаннем сродкаў воднага транспарту альбо iншымi плывучымi сродкамi асабiстага карыстання»…
На мяжы будуць таксама працаваць 11 аўтадарожных пунктаў пропуску памежнага насельнiцтва: Твярачус (Лiтва) — Вiдзы (Беларусь), Адуцiшкiс — Мальдзевiчы, Папялякiс — Лынтупы, Прыянай — Камелiшкi, Шумскас — Лоша, Ураляй — Клявiца, Нарвiлiшкес — Пiцкуны, Кракунай — Геранёны, Эйшышкес — Доцiшкi, Ракай — Пяцюлеўцы, Лацяжарыс — Парэчча.
Адначасова лiтоўскi i беларускi бакi пагадзiлiся з тым, што пункт пропуску Твярачус — Вiдзы пасля яго ўладкавання i стварэння неабходнай iнфраструктуры будзе дзейнiчаць у рэжыме мiжнароднага пасажырскага аўтадарожнага пункта пропуску.
Пункт пропуску Адуцiшкiс — Мальдзевiчы пасля яго ўладкавання i стварэння неабходнай iнфраструктуры будзе дзейнiчаць у рэжыме мiжнароднага аўтадарожнага пункта для пропуску аўтамабiляў з абмежаваннем iх агульнай вагi да 7,5 тоны, а таксама для парожнiх аўтамабiляў, якiя маюць Еўра‑1, Еўра‑2 i Еўра‑3 сертыфiкаты.
Цяпер чытаюць
Бабарыка: Калі б мы перамаглі — вайны ва Украіне не было б23
Каментары