Forbes nazvaŭ samych paśpiachovych miljarderaŭ 2017 hoda: Bił Hiejts bolš nie na pieršym miescy
Amierykanski časopis Forbes vyznačyŭ samych paśpiachovych miljarderaŭ 2017 hoda — tych, chto za minuły hod naraściŭ abjom svajoj majomaści bolš za ŭsio. Lidaram rejtynhu staŭ zasnavalnik i kiraŭnik Amazon Džef Biezas, jaki taksama staŭ najzamožniejšym čałaviekam na płaniecie pa viersii Forbes.
Aktyvy Biezasa za hod padaraželi na $33,8 młrd i ciapier aceńvajucca ŭ $98,6 młrd. Asnoŭny rost pryniesła padaražańnie akcyj jaho anłajn-rytejlera Amazon u kastryčniku 2017 hoda — mienavita tady Biezas abyšoŭ tradycyjnaha lidera rejtynhu miljarderaŭ, zasnavalnika Microsoft Biła Hiejtsa.
Na druhim radku rejtynha raźmiaściŭsia ŭładalnik kitajskaha zabudoŭščyka Evergrande Group Siuj Cziaiń, čyja majomaść za niapoŭny hod pavialičyłasia na $27,4 młrd — da $36,5 młrd, abo amal u čatyry razy ad pačatku hoda. Pryčynaj takoha ŭźlotu źjaŭlajecca padaražańnie akcyj kampanii na 400% paśla taho, jak u siaredzinie hoda zabudoŭščyk daŭ spravazdaču ab značnym roście dachodu i prybytku.
Na trecim miescy — prezident hrupy kampanij Louis Vuitton Biernar Arno, majomaść jakoha za hod vyrasła amal udvaja: ad $23,6 młrd da $40,3 młrd.
U śpis paśpiachovych miljarderaŭ trapiŭ taksama zasnavalnik Facebook Mark Cukierbierh, jaki za hod zmoh pavialičyć svaju majomaść na $23,6 młrd — da $72 młrd.
Adzinaj žančynaj u śpisie stała akcyjanier kitajskaje kampanii Country Garden Holdings Jan Chuejiań.
Kamientary