Januš Višnieŭski, šmat paezii i Zajac PC: fiestyval knihi Pradmova abviaściŭ prahramu
Fiestyval projdzie 15—18 kastryčnika ŭ minskim Pałacy mastactva (vuł. Kazłova, 3) i pradstavić niekalki dziasiatkaŭ padziej, pajadnanych temaj knihi.
Sioleta častka mierapryjemstvaŭ projdzie anłajn. U metach karanavirusnaj biaśpieki na ŭsie padziei, akramia knižnaha kirmašu i niekatorych uračystaściaŭ, treba budzie prajści papiaredniuju rehistracyju. Udzieł u mierapryjemstvach fiestyvalu — biaspłatny.
Chto ŭdzielniki?
Januš Leon Višnieŭski (Polšča), papularny polski aŭtar zavitaje na fiestyval, kab prezientavać praciah suśvietna viadomaha ramana «Adzinota ŭ siecivie». Kniha nazyvajecca «Kaniec adzinoty» i vyjšła pa-biełarusku ŭ vydaviectvie»Januškievič».
Linor Haralik (Rasija—Izrail), izrailskaja ruskamoŭnaja piśmieńnica i pierakładčyca. A jašče jana — aŭtarka tych samych komiksaŭ «Zajac PC i jaho ŭjaŭnyja siabry». Na fiestyvali projdzie vystava komiksaŭ Linor, a taksama zapłanavana dyskusija ź Viktaram Marcinovičam na temu postapakaliptyčnych ramanaŭ. Haralik dałučycca da fiestyvalu anłajn.
Barys Pasternak (Rasija), vydaviec, dyrektar vydaviectva «Vriemia» padzielicca dośviedam pracy ź biełaruskimi aŭtarami, adkaža na pytańni, u čym fienomien knih Śviatłany Aleksijevič ci jość u biełaruskich piśmieńnikaŭ šaniec na jašče adnu Nobieleŭskuju premiju.
Michaił Minakoŭ (Ukraina—Italija), historyk, fiłosaf i palitołah. Jon voźmie anłajn-udzieł u mižnarodnaj dyskusii «Stan i pierśpiektyvy palityčnych i sacyjalnych navuk na postsavieckaj prastory, ich zdolnaść apisvać aktualnyja padziei», a taksama prezientuje svaje novyja knihi i časopis»Idieołohija i politika».
Žarka Jovanoŭski (Charvatyja) pačytaje svaju iraničnuju (i miescami chulihanskuju) paeziju razam ź pierakładčykam Andrejem Chadanovičam na imprezie pad nazvaj «Dziaržava, jakaja chacieła zrabicca miadźviedziem».
Siarod biełaruskich chedłajnieraŭ hetaha hoda — Valancin Akudovič, Alhierd Bacharevič, Ihar Babkoŭ, Maksim Žbankoŭ, Taćciana Zamiroŭskaja, Artur Klinaŭ, Viktar Marcinovič, Hanna Sieviaryniec, Dźmitryj Strocaŭ. Što jašče budzie? Kožny dzień padčas fiestyvalu z 11. 00 da 21. 00 budzie pracavać knižny kirmaš.
Na Pradmova buduć uručanyja adrazu niekalki litaraturnych premij: premija imia Ježy Hiedrojca za najlepšuju prazaičnuju knihu, premija imia Karłasa Šermana za najlepšyja knihi pierakładaŭ na biełaruskuju movu, premija Ciotki ŭ halinie dziciačaj litaratury, premija imia Michała Aniempadystava za najlepšy dyzajn knižnaj vokładki.
Jašče adbudziecca viečaryna z nahody 10-hodździa premii «Debiut» imia Maksima Bahdanoviča z udziełam pieramožcaŭ i šort-listaraŭ premii.
Čakajucca kałabaracyi ź inšymi mastackimi prajektami: fotaprajektam «Źmiena», konkursam i vystavaj «Art-Pradmova», kupałaŭcami, kulturnickim prajektam wir. By i inš. Na fiestyvali pakažuć film Alaksieja Pałujana «Voziera radaści» pa matyvach adnajmiennaj knihi Viktara Marcinoviča.
Padrabiaznaja prahrama fiestyvalu sa spasyłkami na rehistracyju — tut.
Kamientary