Štodzionnaja kava stymuluje kišečnik i źnižaje ryzyku Parkinsona. Kab dakazać heta, praviali niezvyčajny ekśpierymient
Zvyčka pačynać dzień z kubka kavy nie prosta idzie na karyść stravavańniu, ale i słužyć prafiłaktykaj ciažkich uzrostavych zachvorvańniaŭ. Dziakujučy novamu daśledavańniu vyśvietliłasia, jak mienavita napoj maduluje mikrafłoru i da čaho tut pierystaltyka ŭnutranych orhanaŭ.
Jak źviarnuŭ uvahu telehram-kanał «cybulinka» na daśledavańnie ŭ časopisie Gut Microbiology, u ekśpierymiencie navukoŭcaŭ z Kapienhahienskaha ŭniviersiteta ŭziaŭ udzieł 61 zdarovy čałaviek.
Dobraachvotnikaŭ padzialili na dźvie hrupy na asnovie vaśmidzionnych dziońnikaŭ charčavańnia: tych, chto spažyvaje kavu časta (bolš za try dni z vaśmi), i tych, chto pje jaje redka. Siaredniaje spažyvańnie ŭ pieršaj hrupie skłała 343 mililitry na dzień, tady jak u druhoj — kala 18 mililitraŭ. Daśledčyki štodnia analizavali ŭzory ich mikrabijoty, a taksama šukali ŭ mačy kafiein i jaho mietabality.
Kab daviedacca, što mienavita adbyvajecca sa straŭnikam paśla vypitaj kavy, 50 udzielnikaŭ prahłynuli biespravadnuju kapsułu SmartPill. Hetaja pryłada pamieram 26,8 na 13 milimietraŭ — niestravavalny datčyk. Prachodziačy praz straŭnikava-kišačny trakt, kapsuła ŭ realnym časie źbiraje danyja pra tempieraturu, uzrovień pH i cisk, jaki adlustroŭvaje skaračeńni ciahlic.
Infarmacyja pieradajecca praz radyjochvali na źniešni pryjomnik, zamacavany na žyvacie pacyjenta. Technałohija dazvoliła daśledčykam dakładna fiksavać čas znachodžańnia kapsuły ŭ roznych adździełach kišečnika i fizijałahičnyja źmieny na roznych etapach stravavańnia.
Vyniki pakazali, što častaje spažyvańnie kavy naŭprost źviazana z bolšaj raznastajnaściu mikraarhanizmaŭ.
U amataraŭ napoju navukoŭcy zafiksavali pavyšanuju kolkaść bakteryj rodu Lawsonibacter i Slackia, jakija zdolnyja pierapracoŭvać karysnyja rečyvy — palifienoły.
Adnačasova źviestki z kapsuł paćvierdzili suviaź pamiž mietabalitami kafieinu i padvyšanym ciskam u toŭstym kišečniku.
Aktyŭnyja skaračeńni muskułatury dapamahajuć źmiešvać źmieściva i padtrymlivać stravavańnie, što tłumačyć viadomy efiekt kavy, jaki prymušaje ludziej iści ŭ prybiralniu nieŭzabavie paśla kubka napoju. Navukoŭcy adznačajuć, što takaja stymulacyja moža słužyć prafiłaktykaj zaporaŭ i navat źnižać ryzyku raźvićcia chvaroby Parkinsona, dla jakoj prablemy ź pierystaltykaj źjaŭlajucca adnym z rańnich simptomaŭ.
Pry hetym daśledčyki ŭdakładniajuć, što bolš aktyŭnaje źmiešvańnie nie abaviazkova pryvodzić da paskareńnia ahulnaha času prachodžańnia ježy praz arhanizm.
Pobač z čakanymi vynikami datčyki zafiksavali źjavu, jakaja patrabuje dadatkovaha vyvučeńnia. U hrupie ludziej, jakija rehularna pili kavu, uzrovień pH u tonkim kišečniku byŭ značna nižejšym u paraŭnańni z tymi, chto ŭžyvaŭ jaje redka.
Navukoŭcy pakul nie vyśvietlili dakładny miechanizm hetaj źjavy: nieviadoma, ci kava naŭprost źmianiaje fizijałahičnyja paramietry i ŭpłyvaje na kisłotnaść, ci heta vynik źmianieńniaŭ u mikrobnym mietabaliźmie ŭ adkaz na rehularnaje pastupleńnie kafieinu.
Daśledavańnie dakazvaje, što štodzionnaja kava vykonvaje rolu nie tolki stymulatara niervovaj sistemy, ale i aktyŭnaha madulatara kišačnaj mikrabijoty.
Fizijałahičnyja danyja, sabranyja z dapamohaj elektronnych kapsuł, paćviardžajuć zdolnaść napoju ŭpłyvać na pierystaltyku, adnak poŭny śpiektr nastupstvaŭ ad źnižeńnia ŭzroŭniu pH u tonkim kišečniku zastajecca pradmietam dla budučych navukovych prac.
Ciapier čytajuć
Dyrektar Viciebskaha centra sučasnaha mastactva Andrej Duchoŭnikaŭ pierajechaŭ u Sierbiju — jon raskazaŭ pra danosy ŭ kultury, nieadukavanaść ministraŭ i čyj ža Šahał10
Kamientary