Дождж, які апанаваў туманны Менск у нядзелю, апоўдні сьціх. Адкрыцьцё мэмарыялу на магіле Яўгена Куліка і ягонай маці было асьветленае сонцам. «Калі Караткевіча хавалі, таксама сьпярша быў дождж, а потым сонца выйшла», — напаўголасу зазначыў нехта з прысутных.
Стылізаваную гранітную каплічку з манаграмай ЯК (праца Віктара Маркаўца) упрыгожыла вялікае бел-чырвона-белае палотнішча — сьцяг, эскіз якога намаляваў Я.Кулік і які ў 1991 г. стаў дзяржаўным.
На Кальварыйскія могілкі сабраліся тры дзясяткі чалавек, пераважна прадстаўнікі інтэлігенцыі.
Выдавец Зьміцер Санько зазначыў, што ў асобе Я.Куліка мы мелі найперш маральнага аўтарытэта. У прамовах выступоўцы згадвалі Кулікову майстэрню «На паддашку», якая была кузьняй нацыянальнай думкі. Згадвалі дзейнасьць мастака пры ўтварэньні Беларускага народнага фронту.
Ушанаваньне памяці Куліка працягнулася ў кавярні «Фальварак Добрыя Мысьлі»: тут адкрылася выстава ягоных твораў — пэйзажы, партрэты, натурморты. Тут гучала менш патэтычных прамоваў і больш сяброўскіх успамінаў. Алесь Марачкін згадаў, што менавіта Кулік прапанаваў назву «Пагоня» для мастакоўскай суполкі, задуманай Міколам Купавам. Куліка называлі «геніяльным экспазыцыяністам»: над разьмяшчэньнем твораў на выставе ён мог працаваць бяз стомы — аднаго разу працаваў над разьмяшчэньнем 5 карцінаў з раніцы да вечара.
Неаднаразова згадвалі энцыкляпэдычныя веды мастака што да беларускага мастацтва й этнаграфіі. Так, Алесю Шатэрніку падчас працы над скульптурай «Колас-настаўнік» Кулік маляваў поршні — характэрны сялянскі абутак. З.Санько прыгадаў паштоўку з нацыянальнай сымболікай, якую мастак намаляваў у 1980 г. да 1000-годзьдзя Беларусі. Разасланая па беларускіх дзеячах, яна невядомым чынам патрапіла на Захад і была растыражаваная як «Падпольнае выдавецтва ў Беларусі». Пад ціскам КГБ Кулік мусіў выступіць супраць «бебурнацаў», аднак знайшоў геніяльнае выйсьце: у інтэрвію газэце «Голас Радзімы» ён абурыўся парушэньнем ягоных аўтарскіх правоў, не адмаўляючыся ад самой паштоўкі.
P.S. Грошай, сабраных сваякамі й сябрамі Яўгена Куліка, не хапіла цалкам расплаціцца за ўзьвядзеньне мэмарыялу. Ахвотныя дапамагчы ў гэтай сьвятой справе могуць зьвяртацца з ахвяраваньнямі на тэл. 286-00-75, 400-89-86. Тутсама прымаюцца ахвяраваньні на выданьне альбому твораў мастака.
Цяпер чытаюць
Каля плошчы Бангалор у Мінску вырас яшчэ адзін звышсакрэтны аб’ект19
Каля плошчы Бангалор у Мінску вырас яшчэ адзін звышсакрэтны аб’ект
«Калі б я быў следчым КДБ, я б падкрэсліў тое самае». Фядута — пра схаваныя сэнсы «Каласоў пад сярпом тваім», увагу сілавікоў да свайго рукапісу і загадку з трэцяй часткай рамана Караткевіча1212
Каментары