Аляксандр Куль.
Сёння, 8 кастрычніка, беларусы ў Рызе ў рамках баскетбольнага турніру Адзіная ліга ВТБ згуляюць з мясцовым ВЭФам.
А потым будуць дзве хатнія сустрэчы: 14 кастрычніка — «Чырвоны Кастрычнік» (Валгаград), 20 кастрычніка — «Няптунас» (Клайпеда).
Гульні традыцыйна будуць адбывацца на «Мінск-Арэне». Пачатак у выхадныя дні а 16-й. У будні а 19-й. Абанемент на ўсе 12 матчаў будзе каштаваць 120-150 тысяч рублёў. Білеты на асобныя матчы — у раёне 20-25 тысяч.
Легіянеры
У міжсезонні «Цмокі» істотна змянілі склад. Перш за ўсё каманда традыцыйна пазбавілася ўсіх легіянераў.
Цэнтравога Атэра Маджока не вельмі шкада. Хоць гэты аўстраліец суданскага паходжання і стаў любімцам мінскай публікі, але чакаць ад яго вырашэння звышзадач не выпадала. Кожнае ягонае не траплянне ў кошык гледачы сустракалі смехам: «Ну што зрабіць — гэта ж Маджок».
Т’еры Браўн меў досвед гульняў у Нацыянальнай баскетбольнай асацыяцыі («Х’юстан», «Кліўленд», «Лейкерс»). У НБА абы-каго не бяруць. І калі ў Браўна каціла, то спыніць гэтага хлапчыску было вельмі цяжка. Праўда, вельмі часта Браўн на пляцоўцы шчыра валяў дурня.
Ну, і літовец Відас Гінявічус быў не самым феерычным гульцом каманды. Але коўдру на сябе не цягнуў, як Браўн. Выконваў мноства чарнавой працы, быў адным з тых, чыя гульня ніколі не падала ніжэй пэўнай планкі. На Гінявічуса можна было спадзявацца.
Сёлета легіянераў у «Цмоках» паболела: замест трох атрымалі пяцярых (чатыры амерыканцы і балгарын). Амерыканцы прайшлі на радзіме праз універсітэцкія лігі, а потым гулялі ў самых экзатычных чэмпіянатах — ад Фінляндыі да Венесуэлы. Якога яны ўзроўню, пабачым ужо ў пачатку сезона.
Страта Кудраўцава
Лідар «Цмокаў» Аляксандр Кудраўцаў перабраўся ў больш сонечныя краі. Прынамсі бліжэйшы сезон беларус будзе абараняць колеры турэцкага «Газіянтэпа». «У Турцыі бачу перспектыву: калектыў падабраўся добры, каманда ўдзельнічала ў еўракубках, моцны чэмпіянат», — матывацыя Кудраўцава.
З беларускіх набыткаў звяртае на сябе ўвагу вяртанне Віталя Лютыча.
Гэты 21-гадовы хлопец апошнія тры гады правёў у літоўскім «Шаўляі». На сённяшні момант Лютыч з’яўляецца ці не самым перспектыўным беларускім баскетбалістам. Дарэчы, гэта малодшы брат лідара беларускамоўнага рок-гурта BN Алеся Лютыча.
Кайрыс
Змяніўся таксама галоўны трэнер «Цмокаў». Цяпер былы рулявы Андрэй Крыванос будзе дапамагаць у працы літоўскаму спецыялісту Дональдасу Кайрысу. Яму ўсяго 36 гадоў. Аднак нягледзячы на ўзрост, літовец паспеў шмат дзе папрацаваць: «Лакаматыў-Кубань» (Расія), «Дняпро-Азот» (Украіна). Праўда, поспехаў нідзе не дасягаў.
На чале «Цмокаў» хацелі бачыць іншага літоўца — трэнера жаночай зборнай Беларусі па баскетболе Рымантаса Грыгаса, — але ён адмовіўся ад прапановы.
У першы сезон у Адзінай лізе ВТБ «Цмокі» атрымалі адну перамогу. Летась — тры. Спадзяёмся, што ў гэтым годзе перамог бу-дзе яшчэ болей.
Куль: Ніхто не павінен хадзіць на баскетбол «добраахвотна-прымусова»
Дырэктар цэнтра эканамічнага развіцця і спартыўнага маркетынгу «Цмокаў» Аляксандр Куль адказаў на некалькі пытанняў «Нашай Нівы».
«Наша Ніва»: Чым будзеце прывабліваць людзей на трыбуны?
Аляксандр Куль: У першую чаргу запаўняльнасць будзе залежыць ад таго, як гуляе каманда. Гледзячы па міжсезонцы, як «Цмокі» ўкалваюць, як гуляюць, можна спадзявацца на годны вынік. І калі перамогі будуць, то і нашаму аддзелу будзе працаваць лягчэй. А так ніякі ровар мы не вынаходзім. Бу-дзем зацягваць людзей на трыбуны рэкламай, інфармацыяй у СМІ пра клуб і гульцоў. Таксама сёлета з’явіцца маскот (вядома, цмок), які будзе забаўляць публіку, з ім можна сфатаграфавацца.
«НН»: На матчах хакейнага «Дынама» можна выпіць піва. На «Цмоках» нельга. Ці зменіцца нешта?
АК: Адносна піва пытаюцца вельмі часта. Адкажу, што хутчэй «не», чым «так». Наколькі я разумею, хакейнае «Дынама» — гэта такое выключэнне. Што датычыць крамак харчавання, то яны будуць працаваць па-ранейшаму. Што тычыцца кавярняў на «Мінск-Арэне», каб яны працавалі, патрэбна публікі не менш, за 4 тысячы чалавек. Будзе столькі людзей — кавярні запрацуюць.
«НН»: А на якую аўдыторыю разлічваеце?
АК: На самую максімальную. Канечне, разумею, што сходу касмічных лічбаў не будзе. Калі на першыя гульні сезона прыйдзе 2-3 тысячы чалавек, то буду задаволены. У канцы сезона разлічваю на лічбу ў 6—7 тысяч.
«НН»: А што з прадукцыі з выявай «Цмокаў» можна будзе набыць?
АК: Нейкая мінімальная су-венірка падрыхтаваная, але гэтага малавата. Мы троху абмежаваныя ў сродках. Дакладна будуць байкі, бейсболкі, магніты. Яшчэ мне хацелася б бачыць рамяні, кашалькі, заплечнікі ды шмат чаго іншага.
«НН»: Апошні сезон «Цмокі» не займаліся загонам на трыбуны школьнікаў для масавасці. Тут нічога мяняць не будзеце?
АК: Гэта наша прынцыповая пазіцыя. Ніхто не павінен хадзіць на баскетбол «добраахвотна-прымусова». Чалавек павінен ісці на відовішча, якое яму цікавае, атрымліваць ад гэтага асалоду, а не таму, што так камусьці трэба запоўніць трыбуны.
«НН»: Не зусім да вас пытанне, але каманда стала мацней шай у параўнанні з мінулым сезонам?
АК: Больш чым упэўнены ў гэтым.
Расклад хатніх гульняў
14 кастрычніка. 19:00. «Цмокі» — «Чырвоны Кастрычнік» (Валгаград);
20 кастрычніка. 16:00. «Цмокі» — «Няптунас» (Клайпеда);
3 лістапада. 16:00. «Цмокі» — ЦСКА (Масква);
17 лістапада. 16:00. «Цмокі» — «Астана»;
1 снежня. 16:00. «Цмокі» — «Хімкі»;
14 снежня. 16:00. «Цмокі» — «Чырвоныя Крылы» (Самара);
19 студзеня. 16:00. «Цмокі» — ВЭФ (Рыга);
16 лютага. 16:00. «Цмокі» — «Азоўмаш» (Марыупаль);
16 сакавіка. 16:00. «Цмокі» — «Трыумф» (Люберцы).
«Цмокі-Мінск» — баскетбольны клуб, заснаваны ў 2006 г. Доўгі час выступаў пад назвай «Мінск-2006». Перайменаваны ў «Цмокі» ў мінулым годзе. Як адзначыў Аляксандр Куль, «Цмокаў» можна лічыць першымі беларускімі «баскетбалістамі», бо вельмі часта на выявах яны трымаюць у лапах камяні, а не мячы. Чэмпіён Беларусі апошніх пяці гадоў.
Адзіная ліга ВТБ — баскетбольны турнір, створаны ў 2008 г. Аб'яднаў наймацнейшыя клубы Усходняй і Паўночнай Еўропы. На сённяшні дзень у ВТБ гуляюць каманды з Расіі, Беларусі, Літвы, Латвіі, Эстоніі, Украіны, Казахстана, Польшчы і Чэхіі. Прэзідэнт Адзінай лігі ВТБ - генерал Сяргей Іваноў, кіраўнік Адміністрацыі прэзідэнта Расіі.
