Радзькоў прызнаў вялікі недабор у педагагічныя і сельскагаспадарчыя ВНУ

Неабходна падумаць пра тое, як прыцягнуць моладзь у педагагічныя і сельскагаспадарчыя ВНУ.

Аб гэтым заявіў сёння першы намеснік кіраўніка Адміністрацыі прэзідэнта Беларусі, старшыня Рэспубліканскага грамадскага аб'яднання «Белая Русь» Аляксандр Радзькоў на семінары для членаў арганізацыі.

«Сёлета мы заўважылі, што на фізіка-матэматычных факультэтах педагагічных універсітэтаў недабор», — прывёў прыклад Радзькоў. Ён звярнуў увагу, што цяпер нярэдка скардзяцца, што ў ВНУ паступіць цяжка, трэба наймаць рэпетытара і г.д.

«Калі ласка, ідзі не толькі на фізмат. У сельскагаспадарчых ВНУ таксама недабор», — сказаў ён.

На яго думку, вырашыць праблему недабору на гэтыя спецыяльнасці наўрад ці можна, павялічыўшы стыпендыю або даўшы ўсім інтэрнаты.

«Чаму не пойдуць? Бо сучасная моладзь — прагматыкі», — мяркуе Радзькоў.

У той час як ёсць недахоп моладзі пры наборы на згаданыя спецыяльнасці, у такой ВНУ, як БДУІР, праблем з недаборам на праграмістаў няма. Больш за тое, тыя, хто можа вучыцца на бюджэце на інжынера-электроніка, нярэдка ідуць вучыцца на праграмістаў на платныя месцы, каб потым выгадна ўладкавацца ў ІТ-сферы.

«Раней паступіў у ВНУ — гэта было шчасце. А зараз яны глядзяць, што на выхадзе», - сказаў ён.

Аляксандр Радзькоў адзначыў, што адзін з варыянтаў вырашэння такіх праблем — гэта пошук дзяцей, схільных да працы ў той ці іншай сферы літаральна з дзіцячага саду. Неабходна прыцягваць моладзь на педагагічныя спецыяльнасці.

«Навучанне матэматыцы і фізіцы — гэта гарантаванне нацыянальнай бяспекі», — падкрэсліў кіраўнік арганізацыі «Белая Русь».

Пры гэтым ён звярнуў увагу, што праблемай для якой-небудзь краіны можа быць не проста той факт, што не хапае настаўнікаў матэматыкі, а тое, што няма магчымасці іх падрыхтаваць.

Гаворачы аб канкрэтных метадах прыцягнення моладзі на фізіка-матэматычныя факультэты, Аляксандр Радзькоў прывёў прыклад матэматычных алімпіяд для школьнікаў.

Іх можна праводзіць не толькі для старэйшых класаў, але і для больш малодшых груп.

Алімпіяду можна арганізаваць так, каб дзецям было цікава ў іх удзельнічаць, каб у іх заставаліся добрыя ўражанні. «Такіх формаў шмат, але над імі трэба думаць», — сказаў Аляксандр Радзькоў.

Ён дадаў, што рэктарам ВНУ не варта проста сядзець і чакаць, калі да яго прыйдуць абітурыенты, трэба працаваць у гэтым кірунку.

• 0
• 0
• 0
• 0
• 0
• 0
• 0
• 0