Дзяржкантроль вымагае адстаўкі старшыні Браслаўскага райвыканкаму

Старшыня Браслаўскага раённага выканаўчага камітэта Уладзімір Лакамы павінен быць вызвалены ад займаемай пасады за тое, што на Браслаўшчыне высветлены шматлікія і злосныя парушэнні пры выдзяленні зямельных участкаў ля вадаёмаў. Такое рашэнне прынялі падчас сумеснай калегіі Камітэта дзяржаўнага кантролю Віцебскай вобласці і пракуратуры рэгіёна.

Іх і не толькі, мякка кажучы, здзівілі факты "бязмежных парушэнняў" у Браслаўскім раёне. Вось, напрыклад, устаноўлена, што намеснік старшыні райвыканкама па эканоміцы Ванда Туронак у 2005—2006 гадах атрымала і аформіла ў прыватную ўласнасць на сябе, грамадзянскага мужа і зяця тры зямельныя ўчасткі для будаўніцтва і абслугоўвання жылых дамоў. Апошнія два ўчасткі, выдзеленыя з парушэннем заканадаўства ў прыбярэжнай паласе возера Струста, у далейшым былі прададзены жыхарам Мінска па цане за кожны (згодна з дамовай куплі-продажу) 1 мільён рублёў. Далей цытата з афіцыйных вынікаў праверкі: "У той жа час згодна з атрыманым у ходзе праверкі тлумачэннем пакупнікоў за кожны ўчастак было перададзена па 10 млн рублёў. Устаноўлена, што Туронак В.А. уласнаручна былі падпісаны заявы на выдзяленне ўсіх трох участкаў і атрыманы дакументы пасля іх дзяржаўнай рэгістрацыі. У цэлым вынікамі праверкі пацвярджаецца, што Туронак В.А. у парушэнне патрабаванняў артыкула 22 Закона Рэспублікі Беларусь "Аб дзяржаўнай службе ў Рэспубліцы Беларусь" скарыстала службовае становішча пры ажыццяўленні дзеянняў па набыццю ў прыватную ўласнасць зямельных участкаў"...

Старшыня Браслаўскага райвыканкама, калі адказваў на пытанні ўдзельнікаў пасяджэння калегіі, толькі адзначаў, што нічога не ведаў пра дзеянні сваёй падначаленай. Не змог ён канкрэтна растлумачыць, чаму не выкананы ў поўным аб’ёме тры прадстаўленні, унесеныя пракуратурай раёна ў 2005—2007 гадах. Больш за тое, з мэтай легалізацыі парушэнняў райвыканкамам праводзілася карэкціроўка прыбярэжнай паласы.

Не ўтульна адчуваў сябе на пасяджэнні і намеснік старшыні Браслаўскага райвыканкама Міхаіл Малаток. "Чаму Вы, як старшыня камісіі па выбару зямельных участкаў для будаўніцтва, не прытрымліваліся законнасці, калі падпісвалі акты аб выбары ўчасткаў?" — цікавіліся ў яго. Зразумелага адказу прысутныя не пачулі. Пракуратура Віцебскай вобласці будзе правяраць факты парушэнняў адказнымі асобамі заканадаўства.

Намеснік генеральнага пракурора Беларусі Аляксандр Іваноўскі, адказваючы на пытанні журналістаў, адзначыў, што вінаватыя чыноўнікі павінны быць прыцягнутыя да крымінальнай адказнасці: "Выяўленых фактаў дастаткова, каб пачаць праверку". Больш за тое, ён дадаў: "Адказныя асобы, калі будаўніцтва дамоў вялося з парушэннем заканадаўства, будуць кампенсаваць выдаткі..."

У Мёрскім раёне праверкай былі выяўлены 10 самавольна пабудаваных аб’ектаў, якія трэба было разбурыць. Пракурор раёна афіцыйна папярэдзіў пра гэта старшыню райвыканкама. Але ж зрабіць усё неабходнае ў поўным аб’ёме ў раёне не спяшаюцца. На калегіі вырашылі, што трэба прыцягнуць да дысцыплінарнай адказнасці старшыню райвыканкама. І кіраўніка Полацкага райвыканкама таксама. Тут, у ліку іншага, высветлілі: на землях дзяржаўнага ляснога фонду самавольна агарадзілі 1,6 гектара лесу. За агароджай стаіць 2-павярховы дом. Ёсць і альтанка, нават пірс. Устаноўлена, што жыве тут... 84-гадовая бабулька. Зараз ужо знесена агароджа, а вось дом застаўся на сваім месцы. Пададзена заява ў суд: маўляў, жыць бабульцы няма дзе...

Усяго па выніках праверкі на Віцебшчыне выяўлены 509 фактаў самавольнага заняцця зямельных участкаў, у тым ліку 173 — у прыбярэжных палосах. Выяўлены 533 незаконна пабудаваныя аб’екты.

• 0
• 0
• 0
• 0
• 0
• 0
• 0
• 0