На здымкі фільма «Авель» запрашаюць і ўсіх ахвотных, але плаціць масоўцы не будуць.
28 студзеня ў Мінску пачнуцца здымкі кінапраекта «Авель» — дзяржаўнага адказу на фільм «Жыве Беларусь», які зняў польскі рэжысёр Кшыштаф Лукашэвіч пра падзеі Плошчы снежня 2010 года.
Як паведамляла «Наша Ніва», першымі будуць знятыя кадры дэманстрацыі. Здымкі адбудуцца цягам двух дзён на Кастрычніцкай плошчы і плошчы Незалежнасці.
Як будзе арганізаваная імітацыя Плошчы?
У прадзюсарскім цэнтры «Нонстоп Медыя», які займаецца стварэннем «Авеля», паведамілі, што ніякага ачаплення на плошчах не плануецца.
Больш за тое, у навінах па дзяржаўных каналах нават мяркуюць папярэджваць грамадзян, што праезд па цэнтры горада будзе ўскладнены.
Чакаецца, што колькасць масоўкі дасягне 4000 чалавек. Зразумела, у ніводнай базе няма такой колькасці чалавек. Таму, як паведамілі ў «Нонстоп Медыя»,
масоўка будзе фарміравацца з дзвюх крыніц. Частку аўдыторыі забяспечаць дзяржаўныя структуры, якія прывядуць на плошчу сваіх людзей. Акрамя таго, у здымках змогуць прыняць удзел усе ахвотныя. Праўда, іх праца не будзе аплочвацца.
Прадзюсары абяцаюць, што стварэнне фільма будзе адбывацца адкрыта, з максімальным прыцягненнем журналістаў, якія змогуць задаць любыя пытанні рэжысёру Уільяму Дэ Віталю (сапраўднае прозвішча Віталь Васількоў). Рэжысёр, дарэчы, — украінскі каскадзёр, які пераехаў у ЗША і памяняў прозівшча.
Цяпер чытаюць
Беларус-вахтавік на Ямале стварае песні на беларускай мове з дапамогай ШІ. «Раней музыка была закрытым клубам. Нейрасеткі адчынілі гэтыя дзверы з нагі»1919
Каментары