Манашка шакавала журы музычнага шоу: «Я веру, Папа Францішак патэлефануе мне» ВІДЭА
Гарэзьлівы выступ харызматычнай маладой манашкі шакаваў судзьдзяў і гледачоў шоў «The Voice of Italy».
Паводле правілаў тэлешоў, чальцы журы праслухоўваюць удзельнікаў праекту, адвярнуўшыся плячыма да сцэны. Калі нехта з выступоўцаў падабаецца прадстаўніку журы, той адварочваецца, каб паглядзець на саліста.
Судзьдзям апошняга выданьня «The Voice of Italy» вельмі спадабалася выкананьне песьні Алішы Кіз (Alicia Keys) «No One». Калі ж яны адвярнуліся, то адкрылі раты ад зьдзіўленьня — перад імі была дзяўчына ў манаскай вопратцы.
Чальцоў журы сваім голасам скарыла прадстаўніца манаскага ордэну ўршулянак — 25-гадовая Крыстына Скучча.
«Як Вы аказаліся на праекце?», — запыталі судзьдзі. Сястра Крыстына адказала, што ейны талент — гэта падарунак, якім яна вырашыла падзяліцца.
«Калі б я разгледзеў вас падчас імшы, я б стаў хадзіць у касьцёл стала», — гэтак пракамэнтаваў выступ дзяўчыны яшчэ адзін чалец журы, вядомы ў Італіі рэпэр J-Ax.
Наступнае пытаньне, на якое давялося адказаць удзельніцы, было пра тое, што Ватыкан падумае аб ейным удзеле ў тэлешоу. Сястра Крыстына ня стала хаваць сваіх надзеяў і проста адказала: «Я веру, што Папа Францішак патэлефануе мне».
«Сястра! Сястра!», — скандавалі трыбуны дзеля яе падтрыманьня. За сцэнаю за сястру Крыстыну заўзелі ды трымалі кулакі іншыя прадстаўніцы ейнага ордэну.
Сястра Крыстына адразу сталася зоркаю на Апэнінскім паўвостраве, пра яе пішуць усе італьянскія выданьні. «Мы даўно ня бачылі ў тэлешоў ня толькі манашкі, але і настолькі жывога выступу, поўнага энэргіі ды сапраўднай радасьці жыцьця», — напісала «Il Giornale».
Разам з тым з боку кансэрватыўных колаў пачуліся галасы, што манашцы не выпадае браць удзелу ў шоў і скакаць на сцэне.
«Служыце адны другім тым дарам, які хто атрымаў, як добрыя раздаўцы разнастайнай ласкі Боскай», — працытаваў Новы Запавет ў абарону сястры Крыстыны прадстаўнік Рымскай курыі кардынал Джанфранка Равазі.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім7
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі1010
Каментары