Казахстан, Расія і Беларусь падпісалі дамову аб стварэнні Еўразійскага эканамічнага саюза (ЕАЭС).
Прэзідэнты Казахстана Нурсултан Назарбаеў, Расіі Уладзімір Пуцін і Беларусі Аляксандр Лукашэнка падпісалі дамову аб ЕАЭС па выніках пасяджэння вышэйшага Еўразійскага эканамічнага савета, якое прайшло ў чацвер у Астане. На казахскіх сайтах вядзецца прамая трансляцыя ўрачыстасці.
Дамова ўступіць у сілу з 1 студзеня 2015 г. Мяркуецца, што ў чэрвені-ліпені да Дамовы далучыцца Арменія, а затым — Кыргызстан.
Упершыню ідэя аб стварэнні ЕАЭС агучана прэзідэнтам Казахстана Нурсултанам Назарбаевым у сакавіку 1994 г. У кастрычніку 2007 года кіраўнікамі Казахстана, Расіі, Беларусі падпісана дамова аб стварэнні адзінай мытнай тэрыторыі і фарміраванні Мытнага саюза (МС). 1 ліпеня 2010 г. адзіны мытны кодэкс МС пачаў прымяняцца на тэрыторыі Расіі і Казахстана, 6 ліпеня 2010 года — на ўсёй тэрыторыі МС.
Галоўная мэта стварэння ЕАЭС — фарміраванне адзінага рынку; зняцце бар'ераў для перамяшчэння тавараў, паслуг, інвестыцый, рабочай сілы; правядзенне ўзгодненай эканамічнай палітыкі, накіраванай на стварэнне эфектыўных умоў для вядзення бізнесу. У дамове закладзены механізм кансенсусу пры прыняцці рашэнняў, наднацыянальныя органы Саюза працуюць па прынцыпе «адна краіна — адзін голас», паведамляе news.kz.
Нагадаем, што сёння А. Лукашэнка ў Астане заявіў: «Цяпер у прэсе ўздымаецца вэрхал: «Лукашэнка патрабуе саступак, выгандлёўваеш бонусы для Мінска», гэта я цытую.Ні то Расія, ні то Казахстан чарговы раз ўзвалілі на сябе цяжар эканамічных праблемаў Беларусі.
Хачу гэтай публіцы сказаць: спадары, уйміцеся. Мы з Расіяй, Казахстанам — удзельнікі сумеснага раўнапраўнага працэсу.
І калі будзем узвальваць нешта на плечы адзін аднаго, то гэта таксама на раўнапраўнай аснове. гэта наш сяброўскі саюз», — заявіў Аляксандр Лукашэнка ў ходзе пасяджэння ў вузкім фармаце, кажучы пра тое, што на сёння ў грамадстве з'явілася нямала апанентаў еўразійскай інтэграцыі.
«Ніякіх саступак Беларусь не патрабуе.
Кожны ў інтэграцыі выносіць нешта такое, што цікава для ўсіх. Гэты ўклад абсалютна не абавязаны вымярацца толькі тонамі або кубаметрамі.
Мы свядома падышлі да падпісання дамовы аб Еўразійскім эканамічным саюзе», — сказаў Лукашэнка.
Кіраўнік Беларусі адзначыў, што ў трох краін ёсць яшчэ магчымасці палепшыць агульныя дамоўленасці.
Цяпер чытаюць
Беларусу на 100 гадоў забаранілі ўезд у Расію — за ўдзел у мінскіх маршах 2020 года4
Каментары