Сьпяваць «Варвары» будуць на англійскай і беларускай мовах.
На сумесным канцэрце з «Крамай» у клубе «Графіці» 20 лістапада вядомы расійскі блюзмэн Мікалай Аруцюнаў абвесціў аб стварэнні новага музычнага праекта — гурта «Аруцюнаў і Варвары блюзу». Спяваць «варвары» будуць на англійскай і беларускай мовах.
Як патлумачыў Еўрарадыё Мікалай Аруцюнаў, гэта будзе яго сумесны праект з музыкамі «Крамы». Таму «варвары» — гэта ад прозвішча Варашкевіч, лідэра беларускага гурта.
Аб сумесным праекце музыкі думалі даўно і ўжо неаднаразова працавалі разам на розных канцэртах і фестывалях. Але назва нарадзілася толькі зараз.
Гэтым разам Мікалай Аруцюнаў прыехаў у Мінск для ўдзелу ў фестывалі «Блюз жыве ў Мінску», які пройдзе 23 лістапада ў канцэртнай зале «Мінск». Выступаць яны там будуць у новым амплуа — як асобны беларуска‑расійскі праект.
Музыка спецыяльна прыехаў на два дні раней, каб сыграць з «крамчукамі» ў «Графіці», парэпетаваць разам з імі перад выступам на блюзавым фэсце, прыйсці ў студыю «Еўрапейскага радыё для Беларусі» на інтэрв’ю і паказаць новыя песні, напісаныя спецыяльна для гурта «Аруцюнаў і Варвары блюзу».
Ігар Варашкевіч не разгубіўся і адказаў, што ў яго таксама ёсць што прапанаваць для першай праграмы новага гурта.
Дарэчы, Мікалай Аруцюнаў ужо даўно выконвае дзве «крамаўскія песні»: «Бяжы, хлопец!» і «Выпі са мной да дна». Музыка нарадзіўся ва Украіне і добра разумее беларускую мову. Песні ён выбіраў сам. І зараз хоча, каб частка твораў гурта «Аруцюнаў і Варвары блюзу» гучала па‑беларуску.
Па яго просьбе тэксты для першых дзвюх песень, рэпетаваць якія музыкі пачалі ўжо сёння, будзе пісаць аўтар «Хлопца» і «Выпі са мной»….
Што ж тычыцца самаго канцэрта ў «Графіці», то ён, як заўжды, прайшоў пры поўным аншлагу. Спачатку «Крама» для тых, хто не змог патрапіць на прэзентацыю ў клуб «Фартуна», выканала творы з новага альбома «Усё жыцьцё — дзіўны сон».
Потым выйшаў Мікалай Аруцюнаў. Спачатку ён выканаў некалькі сусветна вядомых рок‑ і блюз‑кампазіцый, а пасля парадаваў слухачоў добрым беларускім вымаўленнем у «крамаўскіх» песнях. Завяршыўся вечар блокам з «крамчукоўскіх» хітоў.
Цяпер чытаюць
Былога беларускага палітвязня судзяць у Літве за падрыхтоўку да забойству расійскага апазіцыянера. Пагражае аж да пажыццёвага6
Каментары