Супрацоўніца Крычаўскага райвыканкама: Мяне назвалі жывёлай, якая села ў крэсла кіраўніка
Начальніца аддзела ідэалагічнай працы, культуры і па справах моладзі Крычаўскага райвыканкама Марына Максімава падала ў суд пазоў на незалежную газету «Вольны горад».
Максімава абвінавачвае журналістаў у нанясенні ўрону яе гонару, годнасці і дзелавой рэпутацыі. Незадаволенасць галоўнага ідэолага раёна выклікала фраза аб тым, што яна «ў ідэалагічнай працы разбіраецца як вядомая жывёла ў апельсінах». Фраза ўтрымлівалася ў артыкуле «Не ў сваім крэсле?», апублікаваным на сайце газеты 9 верасня. У артыкуле гаворка ішла пра стаўленне мясцовых улад да інфармавання грамадзян аб сітуацыі, якая склалася ў раёне пасля абрушэння будынка Крычаўскай гімназіі.
«Фактычна мяне назвалі жывёлай, якая села ў крэсла кіраўніка», — піша Максімава ў пазове, які прыняты да разгляду Крычаўскім раённым судом.
Супрацоўніца райвыканкама сцвярджае, што зараз у магазінах і грамадскім транспарце Крычава яна чуе за сваёй спіной «усмешкі і абмеркаванні». У такой сітуацыі, паводле слоў Максімавай, у яе стала балець галава, пагоршылася працаздольнасць, яна не можа мець нармальныя зносіны са сваімі роднымі і блізкімі, ёй немагчыма працягваць актыўнае грамадскае жыццё.
Марына Максімава просіць суд абавязаць «Вольны горад» апублікаваць абвяржэнне, а таксама спагнаць з адказчыкаў 10 млн рублёў у якасці кампенсацыі маральнага ўрону.
Каментуючы сітуацыю, рэдактар «Вольнага горада» Сяргей Няроўны адзначыў: «Пасля абрушэння гімназіі, якое выклікала шок у горадзе, і ён поўніцца чуткамі, раённая газета «Кричевская жизнь», якая курыруецца аддзелам ідэалогіі, як вады ў рот набрала. Ні ад рэдакцыі газеты, ні ад Максімавай не было адказаў на пытанні, як працуе штаб, як арганізаваны падвоз дзяцей, якія праблемы ўзнікаюць і як іх вырашыць».
«Няўжо ідэалагічная праца заключаецца ў тым, каб толькі прыкрыць усю інфармацыю, якая хвалюе людзей, і пісаць толькі пра ўручэнне прэмій і рэпертуар хору ветэранаў? А тое, што рэальна хвалюе людзей, — а гэта 540 навучэнцаў, каля сотні настаўнікаў, бацькі, якія перажываюць, — ні слова», — гаворыць журналіст.
Паводле яго слоў, толькі пасля публікацыі артыкула «Не ў сваім крэсле?» газета «Кричевская жизнь» апублікавала маленькую нататку пра абрушэнне гімназіі і стварэнне штаба па ліквідацыі наступстваў.
Суд над газетай прызначаны на 22 кастрычніка.
Каментары