У аўторак на еўрапейскіх і сусветных біржах працягнулася імклівае падзенне ключавых гатункаў нафты — Brent і WTI менш чым за суткі страцілі ў цане больш за два даляры за барэль.
Падзенне каціровак пацвярджаюць еўрапейскія агенцтвы і анлайн-інструменты гандлю.
Сырая нафта еўрапейскай маркі Brent (гатунак, які здабываецца ў Паўночным моры) да сярэдзіны ранішняй біржавы сесіі страціла 2,5% і ўпала да $ 82.62 на Лонданскай таварнай біржы. Амерыканская сырая нафта цяпер гандлюецца па каціроўках каля $76 за барэль, паведамляе брытанскае выданне The Telegraph.
The Telegraph дадае, што такія каціроўкі зніжаюць кошт амерыканскай нафты да ўзроўню, блізкага да сабекошту, і з-за гэтага істотна скарачаюць прыбытак амерыканскіх нафтавікоў.
Інструменты маніторынгу кошту нафты дэманструюць, што пасля ранішняга падзення яна трымаецца на нізкіх адзнаках. Мінімальныя каціроўкі маркі Brent пасля абеду дасягалі $82.07 за барэль. WTI таксама працягвае зніжэнне ў бок індыкатара $76.
Каціроўкі расійскай нафты Urals стануць вядомыя пасля заканчэння біржавога дня. Як сведчаць графікі, Urals, як правіла, таннее праз некалькі дзён пасля ўстойлівага зніжэння цэны на еўрапейскую і амерыканскую нафту.
Аналітыкі адзначаюць, што прычынай падзення цаны нафты стала зніжэнне кошту яе пастаўкі з Саудаўскай Аравіі ў ЗША і Азіі, пра які раней абвясціла нацыянальная нафтавая кампанія Saudi Arabian Oil. З дапамогай такіх мер саудаўскія здабытчыкі плануюць павялічыць сваю долю на амерыканскім рынку.
Як вядома, цана на нафту з'яўляецца ключавым параметрам, які вызначае дэфіцытнасць расійскага бюджэту.
Каментары