Падчас удзелу ў вясенняй сесіі Міжнароднага валютнага фонду і Сусветнага банка, якая пройдзе 17—18 красавіка ў Вашынгтоне, беларуская дэлегацыя прадставіць фонду «дарожную карту» па структурным рэфармаванні эканомікі.
Паводле інфармацыі БелаПАН, «дарожная карта» прадугледжвае перагляд механізмаў размеркавання фінансавых рэсурсаў у эканоміцы, трансфармацыю сектара дзяржпрадпрыемстваў, паэтапную адмену практыкі рэгулявання цэн і ўмацаванне сістэмы сацыяльнай абароны насельніцтва.
Рэфармаванне сістэмы размеркавання фінансавых рэсурсаў, у прыватнасці, прадугледжвае паэтапную адмову ад дырэктыўнага крэдытавання эканомікі. Рэалізаваць гэту меру плануецца шляхам уключэння ў Праграму сацыяльна-эканамічнага развіцця Беларусі на 2016—2020 гады мэтавых паказчыкаў па скарачэнні аб`ёмаў фінансавання дзяржаўных праграм за кошт крэдытнага канала.
«Дарожная карта» прадугледжвае стварэнне стымулаў для павышэння эфектыўнасці і росту прадукцыйнасці працы дзяржаўных прадпрыемстваў за кошт скарачэння аб`ёмаў дзяржпадтрымкі.
Трансфармацыя дзяржсектара прадугледжвае рэструктурызацыю буйных прадпрыемстваў і прыватызацыю малых і сярэдніх суб`ектаў дзяржаўнай формы ўласнасці, якія працуюць у сферы паслуг.
Адначасова з гэтым плануецца рэалізаваць меры па паэтапнай адмене практыкі рэгулявання цэн, паступовае павышэнне ўзроўню тарыфаў на жыллёва-камунальныя і транспартныя паслугі.
Праграма рэформ, якую ўлады маюць намер абмеркаваць з прадстаўнікамі МВФ, таксама ўключае ў сябе меры па сацыяльнай абароне насельніцтва. Гаворка, у прыватнасці, ідзе аб павелічэнні памеру дапамогі па беспрацоўі да ўзроўню мінімальнай заработной платы.
Нагадаем, падчас сакавіцкага візіту місіі МВФ беларускія ўлады выказалі зацікаўленасць у новай крэдытнай праграме з фондам. Кіраўнік місіі МВФ у Беларусі Дэвід Хофман заявіў, што такая праграма магчымая ў выпадку гатоўнасці беларускага кіраўніцтва пайсці на глыбокія структурныя рэформы ў эканоміцы.
«Для новай праграмы з МВФ па-ранейшаму патрабуецца сур`ёзны намер, выказаны на самым высокім узроўні, рэалізаваць комплексны пакет глыбокіх структурных рэформ і паслядоўнай макраэканамічнай палітыкі, які мог бы быць падтрыманы выканаўчым саветам МВФ», — сказаў Хофман.
Кіраўнік місіі фонду падкрэсліў, што пакет мер павінен уключаць у поўнай меры гібкі абменны курс, жорсткую макраэканамічную палітыку і смелыя структурныя рэформы з канцэнтрацыяй асноўных намаганняў на пачатковым этапе.
«Калі ўлады змогуць прадэманстраваць сваю гатоўнасць да такіх рашучых змяненняў у сваёй эканамічнай палітыцы, МВФ гатовы пачаць працаваць над новай праграмай, — запэўніў Хофман.
Памятаеце пару студэнткі і выкладчыка духоўнага вучылішча, які старэйшы за яе на 31 год? Яны разбегліся3
Памятаеце пару студэнткі і выкладчыка духоўнага вучылішча, які старэйшы за яе на 31 год? Яны разбегліся
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну77
Каментары