Па статыстыцы мабільных аператараў навучыліся прадказваць масавыя беспарадкі
Аналагічная методыка па GPS-трэках нават меней эфектыўная.
Навукоўцы з ЗША і Ірландыі навучыліся па адкрытай статыстыцы аператараў сувязі знаходзіць падазроныя скопішчы людзей, распавядае N+1. Даследаванне выкладзенае на arxiv.org.
Па звестках аб тэлефанаваннях і SMS, прывязаных да размяшчэння базавых станцый, навукоўцы могуць скласці карціну «нармальных» паводзін чалавека і пабачыць масавыя «ненармальныя» паводзіны.
Сваю сістэму яны праверылі на звестках аб тэлефанаваннях у Кот-д’Івуары са снежня 2011 года па красавік 2012-га, калі ў краіне разгарэўся палітычны крызіс, што перарос у грамадзянскую вайну. Іх методыка «адгадала» 23 з 25 масавых акцый.
Тым часам ранейшая альтэрнатыўная сістэма, заснаваная на GPS-звестках (якіх на парадак меней), знайшла толькі 19.
Нягледзячы на тое, што людзі робяць тэлефанаванні нерэгулярна, а звесткі аб месцазнаходжанні прывязаныя не да канкрэтнага чалавека, а да сотавай вышкі, методыка пацвердзіла эфектыўнасць на «кластарах» абанентаў і іх руху ад вышкі да вышкі.
Навукоўцы прапануюць укараніць сістэмы маніторынгу «ненармальных» перасоўванняў людзей.
Яна, як сцвярджаюць аўтары даследавання, будзе карыснай не толькі ў прадухіленні беспарадкаў, але і ў планаванні транспартных сетак і іншым удасканаленні гарадской інфраструктуры.
Каментары