Першае інтэрв'ю кандыдаткі ў прэзідэнты: «Кім я працую? Сёння складаны дзень, я адкажу заўтра»
З кожным днём павялічваецца колькасць ахвотных паўдзельнічаць у прэзідэнцкіх выбарах 2015 года. Вечарам 16 ліпеня свае дакументы ў ЦВК аднеслі дзве малавядомыя кандыдаткі, Жанна Раманоўская і Ірына Першына.
У любой краіне кандыдаты ў прэзідэнты пераследуюць пэўныя мэты. Нехта хоча перамагчы, іншыя гатовыя проста «засвяціцца» сярод палітыкаў. Такія кандыдаты-фрыкі перадусім зацікаўленыя ва ўвазе да сваёй асобы.
«Наша Ніва» паспрабавала зразумець матывы, якімі кіравалася Жанна Раманоўская, калі вылучалася ў прэзідэнты. Прыводзім падрадкоўнік размовы з кандыдаткай.
* * *
«НН»: Добры дзень, спадарыня Жанна. Гэта з газеты «Наша Ніва» вас турбуюць. Ці магчыма вам задаць некалькі пытанняў?
Жанна Раманоўская: Можна не сёння, бо мне трэба сёе-тое падкарэктаваць?… (смяецца)
«НН»: У плане? Вы збіраецеся нешта ў сваёй праграме карэктаваць?
ЖР: Не-не. Проста на дадзены момант я… ну не тое што… Увогуле, я занятая. Я працую зараз. Калі вас задавальняе, я з вамі паразмаўляю, але не сёння.
«НН»: Усё ж існуе грамадскі інтарэс, таму, можа, на некалькі пытанняў вы б адказалі зараз? А астатнюю частку ў пятніцу ці ў суботу, калі вам будзе зручна.
ЖР: Прабачце, як вас клічуць?
«НН»: Ягор.
ЖР: Ягор? Я з вамі па-руску размаўляю. Я ў жыцці па-руску, але па-беларуску разумею. Проста я не настроена зараз размаўляць. Я цяпер сяджу і працую.
«НН»: Для нашых чытачоў цікава, як вы ставіцеся да канфлікта на Данбасе. Гэта Украіна ці не? Проста адзін сказ.
ЖР: Ягор, давайце я запішу ваш нумар, у мяне ён вызначыўся, і мы з вамі паразмаўляем пасля.
«НН»: Вы ж збіраецеся змагацца за першую пасаду кіраўніка краіны! Я думаю, гэта вы перадусім зацікаўленыя ў тым, каб вашыя…
ЖР: Я проста зараз працую ў іншым накірунку.
«НН»: Можа, вы патлумачыце хаця б, кім вы працуеце? Бо гэтая інфармацыя таксама нікому невядомая і незразумелая.
ЖР: Дык не, я адкажу на вашыя пытанні. Можна не сёння? Я разумею, што ў вас там, але…
«НН»: Вы балатуецеся ў прэзідэнты і не можаце адказаць, кім працуеце. Гэта ж анекдот!
ЖР: У мяне сёння вельмі складаны дзень…
«НН»: Вы кім працуеце па жыцці?
ЖР: Ягор, вы мяне пачулі?
«НН»: Я не разумею. Вы не можаце адказаць, кім вы працуеце, і вы ідзяце ў прэзідэнты?
ЖР: Ягор, вы мяне не чуеце, так? У мяне сёння вельмі складаны дзень.
«НН»: Вы настаўніца ці не?
ЖР: Настаўніца.
«НН»: Вы настаўніца чаго?
ЖР: Вы хочаце мяне раскруціць? (смяецца) Я не хачу, каб гэта было з бухты-барахты. Нейкія абрыўкі кантэкста…
«НН»: Вы падтрымліваеце палітыку Аляксандра Лукашэнкі ці выступаеце супраць?
ЖР: Я адкажу заўтра.
* * *
Сваю «праграму» Жанна Раманоўская агучыла ў роліку, выстаўленым на Ю'Тубе.
Цяпер чытаюць
На поўначы Беларусі існавала велізарнае возера — у 150 разоў большае за Нарач. Яно знікла ў выніку прыроднай катастрофы, але сляды заўважныя і сёння77
Каментары