Еўракамісія падвяла вынік: за год пасля ўвядзення расейскага прадуктовага эмбарга экспарт харчавання вырас на 5% (4,8 мільярда еўра). Хоць па шэрагу кірункаў, на якіх Расея была галоўным спажыўцом, зафіксаваны спад 10—12%, эмбарга «скаланула» і вытворцаў, і заканадаўцаў і актывізавала працу па выхадзе на новыя рынкі.
У прыватнасці, экспарт у Кітай, Турцыю і Егіпет вырас на 20—30%, перадае «Нямецкая хваля» са спасылкай на справаздачу еўрачыноўнікаў. У Расіі ж эмбарга прывяло да росту цэн.
Еўракамісія апублікавала апошнія даступныя дадзеныя. Са жніўня 2014 года, калі ўступіла ў сілу расійскае эмбарга, па май 2015. У грашовым выражэнні экспарт прадукцыі агракомплексу склаў 105,6 млрд еўра, што на 4,8 млрд еўра больш, чым у перыяд з жніўня 2013 па май 2014 гадоў.
«Асноўныя поспехі дасягнуты дзякуючы павелічэнню прадуктовага экспарту ў ЗША, Кітай, Швейцарыю і шэраг азіяцкіх рынкаў, у прыватнасці Ганконга і Паўднёвай Карэі», — тлумачыцца ў дакуменце. Паводле звестак Еўракамісіі, значна вырас экспарт мяса, мясной і малочнай прадукцыі.
Самы значны спад зафіксаваны ў вытворчасці гародніны і садавіны, дзе Расея была ключавым рынкам для еўрапейскіх фермераў. Вытворчасць агародніны ўпала на 12%, а садавіны — на 10%.
Паводле звестак Еўракамісіі, пастаўкі еўрапейскіх прадуктаў у Паўднёвую Карэю выраслі на 30,8%, у Кітай — на 30, у Турцыю — на 27,1, у Ганконг — на 24,8, у Егіпет — на 21,7 і ў ЗША — на 15,1%. У дакладзе канстатуецца, што захады, накіраваныя на зніжэнне страт у выніку расійскіх санкцый, аказаліся паспяховыя.
У Еўракамісіі адзначылі, што фермеры імкнуцца адаптавацца да новых умоў і выходзіць на новыя рынкі. Са свайго боку, еўрачыноўнікі рапартавалі аб актывізацыі перамоў аб лібералізацыі гандлёвых рэжымаў з шэрагам краін.
Каментары