Расійскі прапагандыст Салаўёў збіраецца выступіць у вялікай зале Палаца Рэспублікі. За грошы
У інтэрнэце з'явілася інфармацыя, што расійскі прапагандыст і телевядоўца Уладзімір Салаўёў у лістападзе плануе прыехаць ў Мінск са сваім «творчым вечарам».
«Усё, што ён робіць, выклікае самыя бурныя эмоцыі. Да яго меркавання прыслухоўваюцца, яно аўтарытэтнае», — апісвае выступоўцу сайт palace.by і дадае, што гледачы змогуць «не толькі выслухаць меркаванне аднаго з самых знаных даследчыкаў і аналітыкаў расійскай сучаснасці, але і задаць свае пытанні».
Кошт квіткоў на выступ прапагандыста дасягае 65 даляраў у эквіваленце.
«Творчы вечар» збіраюцца правесці ў вялікай зале Палаца Рэспублікі — гэта пры тым, што нашай нобелеўскай лаўрэатцы Святлане Алексіевіч нядаўна далі выступіць толькі ў малой.
Уладзімір Салаўёў вядомы сваёй журналісцкай гнуткасцю, якая заўсёды супадае з палітычнай пазіцыяй Крамля. Калі трэба, ён расказвае пра «фашысцкую хунту» і распальвае варожасць да ўкраінцаў. Калі трэба, абвінавачвае Лукашэнку ў антырасійскай рыторыцы.
У «ток-шоу» Салаўёва рэйтынгі звычайна накручваюцца так, як гэта выгадна прапагандзе.
Каментары