Кулінарных кніг з кожным годам становіцца ўсё больш і больш. Экзатычныя стравы, мудрагелістыя рэцэпты, незвычайныя для нашага краю прадукты… Так, гэта, безумоўна, разнастаіць наш стол. Але ў пагоні за модай мы забываемся, з чаго ўсё пачыналася. А калі зазірнуць у гісторыю нашай роднай кухні, то ўбачыш сапраўды неверагодныя рэчы.
У гэтым нам дапамагае новая кніга — «Літвінская кухня. Байкі Кухмістра Верашчакі», створаная гісторыкам Алесем Белым. Аўтар адкрывае для чытачоў велізарны пласт сенсацыйных звестак пра вядомыя-забытыя-невядомыя стравы з зямель колішняга Вялікага Княства Літоўскага, гэта значыць — з нашых беларускіх зямель.
Паглядзіце, як пачынае свой аповед пан Верашчака: «А ведаеце, панове, як даўней елі і пілі ў добрых шляхецкіх дамах старой Літвы? Ну, напрыклад, пры канцы 1820-х гадоў, у залатыя бесклапотныя часы, дзе-небудзь у Наваградскім або Слонімскім павеце?» І сапраўды, ці добра вы ведаеце, як гатавалі зразы ў радзівілаўскіх маёнтках? Ці што можна зрабіць са звычайнага бацвіння? А гісторыя халадніка напісана так смачна, што так і хочацца бегчы на кухню гаспадарыць…
«Кніга складзеная з баек, напісаных Кухмістрам Верашчакам для «Нашай Нівы» і «Звязды» цягам апошняга дзесяцігоддзя.
Блізкае знаёмства з «Кухаркай Літоўскай», кулінарнымі рэаліямі паэмы «Пан Тадэвуш», мемуарамі Леона Патоцкага, Яна Булгака, Мельхіёра Ваньковіча, Міхала Паўлікоўскага і многімі іншымі тэкстамі ХІХ — першай паловы ХХ ст. стварае досыць арганічную карціну кухні, якую сёння ўсё часцей называюць «літвінскай». Гэта шляхецкая і мяшчанская кухня былога ВКЛ, у нейкай ступені таксама заможнага сялянства», — кажа аўтар.
«Літвінская кухня» выходзіць эксклюзіўна ў электронным выглядзе.
Нягледзячы на гэта, у ёй шмат ілюстрацый, якія дапамогуць вам лепей зразумець тэкст. На любой вашай электроннай прыладзе заўсёды будзе пад рукой любімы рэцэпт, вы лёгка і паўсюль зможаце паглядзець у спіс інгрэдыентаў, якія вам спатрэбяцца, каб прыгатаваць шыкоўныя стравы і здзівіць сваім умельствам блізкіх і знаёмых.
Дарэчы, яшчэ да выхаду кніга нарабіла шмат шуму ў сацыяльных сетках і выклікала непадробную цікавасць. Яе абмяркоўваюць, чакаюць і ўжо рыхтуюць начынне на кухні… Паверце, да яе ўжо цяпер няма абыякавых.
Такім чынам, трымайце сапраўдную «Літвінскую кухню» ад славутага пана Кухмістра Верашчакі.
Спампаваць кнігу можна на сайце kniharnia.by/.
«На працягу 30 гадоў незалежнасці беларускамоўныя бюлетэні задавальнялі ўсіх». Камуністы абвінавацілі Бондараву ў распальванні варожасці на моўнай глебе1616
Каментары