«Форма адзення паўсядзённая, пры сабе мець гумовую палку і кайданкі» — апублікаваныя інструкцыі для міліцыянтаў падчас апазіцыйных акцый
У інтэрнэце з'явіліся копіі дакументаў, у якіх апісаныя алгарытмы працы супрацоўнікаў сталічнай міліцыі да і падчас несанкцыянаваных масавых мерапрыемстваў.
У адкрыты доступ копіі дакументаў выклалі апазіцыйныя дзеячы Алесь Лагвінец і Антось Жылка. Апошні з іх убачыў гэтыя паперы пры азнаямленні з матэрыяламі адміністрацыйных спраў, заведзеных на яго за ўдзел у несанкцыянаваных акцыях.
Гаворка ідзе пра рашэнне начальніка Маскоўскага РУУС Алега Шулякоўскага наконт арганізацыі аховы грамадскага парадку пры правядзенні ў Мінску «верагодных несанкцыянаваных масавых мерапрыемстваў» 12 верасня і 19 верасня 2016 года.
Начальнік РУУС палічыў неабходным засяродзіць асноўныя намаганні на «перашкодзе спробам захопу зброі і боепрыпасаў, спыненні фактаў выкарыстання (вывешвання) незарэгістраваных сцягоў, нанясення якіх-небудзь надпісаў, выключэнні магчымага здзяйснення тэрарыстычных актаў, экстрэмісцкіх праяў і іншых супрацьпраўных дзеянняў» і гэтак далей.
Далей ён вызначае задачы для розных аддзелаў РУУС. Да прыкладу, супрацоўнікі ДАІ павінны даглядаць аўтамабілі, каб выяўляць і спыняць «факты захоўвання, перавозкі забароненых прадметаў, выбуховых рэчываў і незарэгістраванай друкаванай прадукцыі» і гэтак далей.
Але больш за ўсё задач ставіцца перад аддзелам аховы правапарадку і прафілактыкі РАУС.
Напрыклад, 12 верасня яны павінны былі з васьмі гадзін раніцы сумесна з раённымі ЖРЭА «арганізаваць працу спецаўтамашын з пад'ёмнікам для своечасовага рэагавання на магчымыя супрацьпраўныя дзеянні (вывешванне незарэгістраванай сімволікі, сцягоў, нанясенне надпісаў), а таксама працу дзяжурных брыгад у ЖЭСах для своечасовага прыняцця мер па выдаленні якіх-небудзь надпісаў і іншай неўстаноўленай атрыбутыкі».
Акрамя таго, перад акцыяй яны павінны былі разам з камунальнікамі абследаваць гарышчы і выхады на дах будынкаў, а таксама высокіх дамоў, «якія можна разглядаць як снайпероудобные пазіцыі».
Прыкладаецца план-расстаноўка, дзе пазначаны прозвішчы міліцыянтаў, якія павінны працаваць на акцыі, з указаннем іх задач і пазыўных.
Да прыкладу, на акцыі 12 верасня мусіць быў прысутнічаць міліцыянт з групы разъяснения. Пры сабе ён павінен быў мець мегафон, камізэльку, радыёстанцыю, дубінку, кайданкі, ліхтарык і свісток.
Акрамя таго, у плане-расстаноўцы значацца групы па дакументаванні з відэакамерамі «ў цывільным», па складанні пратаколаў, па кантролі за гарышчамі і гэтак далей.
У ГУУС Мінгарвыканкама ў прынцыпе не сталі адмаўляць наяўнасць падобных дакументаў.
«Гэта службовая дакументацыя органаў унутраных спраў, таму абмяркоўваць яе немэтазгодна. Скажу толькі, што перад любым мерапрыемствам у Мінску — няхай гэта будзе грамадскае, культурнае ці масавае — робіцца разлік неабходных сіл і сродкаў, што адлюстроўваецца ў падобным дакуменце», — паведаміў БелаПАН прэс-сакратар ГУУС Аляксандр Ластоўскі.
Цяпер чытаюць
Пра Мелказёрава ў яго апошні дзень: «Было адчуванне, што ён стомлены, бракуе энергіі, рысы твару былі запалыя»1
Каментары