Абраны прэзідэнт ЗША Дональд Трамп заявіў, што рыхтуецца да «поўнага адыходу ад бізнэсу» на працягу свайго прэзідэнцкага тэрміну, каб пазбегнуць канфлікту інтарэсаў, піша ВВС.
«Цяпер рыхтуюцца дакументы, падпісаўшы якія, я цалкам выйду з бізнэс-аперацый. Прэзідэнцтва — нашмат больш важная задача», — напісаў магнат у твітары.
«Хоць паводле закона я не абавязаны гэтага рабіць, як прэзідэнт, я лічу важным пазбегнуць канфлікту інтарэсаў са сваімі кампаніямі», — пракаментаваў сваё рашэнне Трамп.
Дэталі свайго сыходу ён абяцае распавесці на прэс-канферэнцыі 15 снежня.
Трамп ацэньвае сваю маёмасць у больш чым 10 млрд даляраў, хоць гэтая ацэнка аспрэчваецца экспертамі. Арганізацыі, якія вывучалі яго фінансы, прыйшлі да розных высноў.
Часопіс Forbes ацаніў яго маёмасць у 4,5 млрд даляраў, кампанія Wealth-X — у 4,4 млрд, а Індэкс мільярдэраў Bloomberg лічыць, што ў Трампа усяго 2,9 млрд даляраў.
Трамп адхіляе ўсе гэтыя ацэнкі, заяўляючы, што ён «каштуе значна больш».
Трамп узначаліў бізнэс свайго бацькі ў 1979 годзе. У 1999 ён пабудаваў самае знакамітае сваё збудаванне — 68-павярховы хмарачос Trump Tower на Пятай авеню ў Нью-Ёрку. За гэтым рушылі ўслед іншыя праекты, якія носяць імя Трампа — Trump World Tower, Trump International Hotel і іншыя.
Трамп таксама развіваў сеткі гасцініц і казіно, але гэты кірунак бізнэсу абярнуўся чатырма банкруцтвамі — зрэшты, удар прыйшоўся па асобных прадпрыемствах, а не па ўсёй бізнэс-імперыі Трампа.
Акрамя гэтага, Трамп займаўся шоў-бізнэсам. З 1996 па 2015 год ён валодаў правамі на конкурсы прыгажосці Міс ЗША і Міс Сусвет, а ў 2003 годзе запусціў на канале Эн-бі-сі рэаліці-шоу «Кандыдат», у якім быў прадзюсарам і вядучым.
Каментары