Віцэ-спікер Вярхоўнай Рады Украіны пра Мінск: Зусім не адчуваеш, што ты ў Беларусі, а не ў Расіі
Украінскі палітык, першы намеснік старшыні Вярхоўнай Рады Украіны Ірына Герашчанка падзялілася на сваёй старонцы ў фэйсбуку ўражаннямі ад наведвання Мінска.
«Самы першы рэйс у беларускую сталіцу прыбывае вельмі рана. Пасля пэўных пошукаў (таму што раніцай тут нічога не працуе, гэта не Кіеў) я аблюбавала адну кавяраньку з добрым капучына. А 8 тут зусім пуста, а 9 зала ўжо запоўнена. Цікавае назіранне, у асноўным гэта мужчыны, якія вядуць дзелавыя перамовы (у Кіеве, наадварот, ранішнія кавярні — месца сустрэч і вясёлага шчабятання дзяўчат). І вось ні аднаго, ні разу не чула тут беларускай. Толькі руская. Афіцыянты, наведвальнікі, усё без выключэння размаўляюць толькі на рускай, і зусім не адчуваецца, што ты ў Беларусі, а не ў Расіі.
Украіне цяпер вельмі цяжка, усе грамадзяне плацяць вельмі высокую цану за самавызначэнне і незалежнасць, за самаідэнтыфікацыю. Але — мы на правільным шляху, на сваім, заваяваным і жаданым намі, як народам і краінай. Так востра адчуваю гэта ў Беларусі. І так страшна, што мы можам, праз уласную бяздумнасць, гэта страціць. Не маем права страціць», — напісала Герашчанка.
У каментах спадарыні Герашчанка пішуць, што ў Кіеве таксама не заўсёды можна пачуць у кавярнях украінскую. «Чым даражэйшая кавярня, тым меней украінскай», — адказваюць ёй. Іншы карыстальнік адзначае, што ў Кіеве прыкладна траціна наведвальнікаў кавярняў усё ж гаворыць па-ўкраінску.
«Гэта вынікі афіцыйнага двухмоўя», — тлумачаць Герашчанка.
***
На тэлеграм-канал «Нашай Нівы» можна падпісацца тут.
Цяпер чытаюць
«Беларусь перадусім». Што вядома пра 23‑гадовага афіцэра спецназа, якога асудзілі на 19 гадоў за «здраду дзяржаве»5
Каментары