«Мы паважаем сваіх герояў, але іх не купляюць». Рамеснікі распавялі, чаму ў цэнтры Гродна прадаюць партрэты Пуціна

На гродзенскай «пешаходцы» чаго толькі не прадаюць: ад сувенірных чарапоў ручной працы да партрэтаў вядомых футбалістаў і палітыкаў. Сярод апошніх аказаўся і партрэт прэзідэнта Расіі Уладзіміра Пуціна. Hrodna.life даведаўся, чаму рамеснікі прадаюць выявы замежных палітыкаў, а пра сваіх выдатных дзеячаў забываюць.

Павялічыць

Партрэт Пуціна прадаюць усяго за 10 рублёў. Побач з ім — славутасці Гродна і партрэт футбаліста Крышціяну Раналду. Аўтар работ кажа, што карціны з сусветнымі знакамітасцямі разыходзяцца добра.

«Так, Пуцін ніякага дачынення да нашага горада не мае, але я ташчуся ад яго, вось і малюю. Яго партрэты людзі купляюць. Вы ведаеце, што гэта, калі карціны возіш цэлы год, а іх ніхто не купляе? У нас свае героі і добрае мастацтва, але гэта тут нікому не трэба, а карціну з Пуціным ці Раналду купляюць турысты. Найлепшы турыст у Гродне — рускі, гэтым усё сказана. Менавіта госці з Расіі больш за ўсё ў нас бяруць», — распавядае аўтар работ.

Да дыялогу мастака з журналістам вырашыў далучыцца яшчэ адзін рамеснік. Карціны з Пуціным ён не прадае, але кажа пра праблему, з якой сутыкаецца штодня на пешаходнай вуліцы.

«Мы паважаем Баторыя, які звязвае нас з Літвой і Польшчай, але турысты з гэтых краін трасуцца за кожную капейку. Яны не купляюць такія карціны, наогул нічога не бяруць. За нейкі магніт, які каштуе 1,5 рубля, яны просяць зніжку. Ну як так можна? А партрэты нашых каралёў і князёў даводзіцца вазіць гадамі, але іх ніхто не купляе, нават мясцовыя. Каму гэта трэба?

Партрэты Пуціна гэта не наша жаданне, быццам мы хочам яго папулярызаваць, проста мы вымушаныя гэта рабіць, на гэта ёсць попыт і нам таксама трэба неяк жыць. Сумна, але сёння такія рэаліі. І як бы мы да Пуціна ні ставіліся, ён ужо ўпісаў сваё імя ў гісторыю. Усё роўна, любіць яго хто-небудзь ці не, гэта сусветная і гістарычная асоба».

Павялічыць

Рамеснікі кажуць, што прадаваць партрэты сусветных асоб сёння эканамічна больш выгадна, чым партрэты вядомых дзеячаў беларускай гісторыі. За адзін партрэт Пуціна яны просяць усяго 10 рублёў.

«У першую чаргу не мы павінны пачынаць прасоўваць сваё, а наша дзяржава, — дадае рамеснік. — Калі сваіх герояў, такіх як Давыд Гарадзенскі, Вітаўт, Баторый, той жа Быкаў, па мясцовым тэлебачанні і радыё не круцяць, то нам адным не пад сілу гэта рабіць. У нас ёсць свая гісторыя і нацыянальныя сімвалы, але іх пакуль не паважаюць на дзяржаўным узроўні. Мне здаецца, хутка прыйдзе час, калі мы вернем свае сімвалы і герояў, але пакуль павінны чакаць і неяк выжываць».

• 0
• 0
• 0
• 0
• 0
• 0
• 0
• 0