Міністр замежных справаў Беларусі Уладзімір Макей 5 сакавіка сказаў, што «Беларусь гатовая да падпісання ключавых дакументаў з ЕС, але ёсць пазіцыя адной краіны».
«Гэтыя дакументы, з нашага пункту гледжання, можна было б падпісаць хоць заўтра. Але, на жаль, так атрымліваецца, што з-за пазіцыі адной краіны Еўрасаюз становіцца закладнікам палітыкі гэтай краіны. Бо адна краіна пераносіць нейкія праблемныя нюансы ў двухбаковых адносінах на ўсю палітыку Еўрасаюза», — адзначыў Макей.
Пра якую ж краіну вядзецца гаворка? Крыніца, блізкая да беларускіх дыпламатычных колаў, паведаміла нам, што, хутчэй за ўсё, міністр выказаўся так пра Літву. Шмат супярэчнасцяў між Беларуссю і Літвой выклікае будаўніцтва нашай краінай атамнай станцыі на мяжы з гэтай краінай.
Каардынатар праграмы «Мінскага дыялогу» Дзяніс Мельянцоў пацвердзіў здагадкі, што гаворка, імаверна, вядзецца пра Літву, але падкрэсліў, што ёсць супярэчнасці і з Польшчай у адным пытанні.
«Гледзячы пра якія перамовы гаварыў спадар міністр. Калі пра «Прыярытэты партнёрства», то гэта Літва праз АЭС. Калі пра спрашчэнне візавага рэжыму — то Польшча, яна хоча асобны дакумент, які б дазваляў краінам Еўрасаюза мець у Беларусі неабмежаваную колькасць консулаў.
Наш бок непакоіцца, што польскія дыпламаты будуць масава выдаваць карты паляка. Таксама ў такім выпадку не працуе прынцып узаемнасці», — адзначае Дзяніс Мельянцоў.
Каментары