Змякчэнне ўмоў каранціну: жыхары Літвы змогуць выязджаць за мяжу
Пасля таго як урад Літвы змякчыў некаторыя правілы каранціну, з панядзелка жыхары могуць пакідаць тэрыторыю краіны, піша Delfi.lt.
У Беларусь можна трапіць праз КПП Мядзінінкай — Каменны Лог, Шальчынінкай — Беняконі і Райгардас — Прывалка.
Памежнікі звяртаюць увагу, што з-за дзеючых абмежаванняў той, хто выехаў у Беларусь, зможа вярнуцца толькі праз Польшчу ці Латвію.
Але жыхары Літвы, якія вярнуліся з-за мяжы, па дзеючых правілах 14 дзён павінны будуць правесці ў каранціне. Замежнікам уезд у Літву па-ранейшаму забаронены. Выключэнне тычыцца толькі перавозчыкаў, дыпламатаў і вайскоўцаў. З 10 мая ў Літве дазволяць авіязносіны на маршрутах, якія ўхваліць урад краіны.
У Літве за ўвесь час выяўлена 1419 выпадкаў каранавіруса, памерлі 46 чалавек. Апошнім часам колькасць выяўленых выпадкаў зніжаецца. 30 красавіка было выяўлена 10 выпадкаў, 1 мая — 14, 2 мая — 7.
Ад сярэдзіны сакавіка ў краіне быў строгі каранцін.
Цяпер чытаюць
Лукашэнка пра вызваленне палітвязняў: Хочуць застацца ў Беларусі — калі ласка6
Каментары