5—7 красавіка Мінск з візітам наведае прэм’ер‑міністр федэральнай зямлі Брандэнбург Маціяс Платцэк у суправаджэнні групы прадпрымальнікаў.
Як паведамляе прэс‑служба пасольства ФРГ у Мінску, візіт адбудзецца па запрашэнні міністра замежных спраў Беларусі Сяргея Мартынава, які ў лютым наведваў Патсдам.
Праграма візіту прадугледжвае сустрэчы ва ўрадзе і з прадстаўнікамі грамадзянскай супольнасці. Плануецца ў тым ліку сустрэча з прэм’ер‑міністрам Сяргеем Сідорскім і міністрам замежных спраў Беларусі.
Як зазначае прэс‑служба пасольства, з восені 2008 года паміж Еўрасаюзам і Беларуссю адбываецца «асцярожнае збліжэнне», і ў гэтым кантэксце пройдуць перамовы Платцэка з прадстаўнікамі ўрада. Іх галоўнай тэмай будзе пашырэнне двухбаковых адносінаў, асабліва, у эканамічнай сферы.
Прадпрымальнікі Брандэнбурга, якія прадстаўляюць фірмы, што працуюць у такіх сферах эканомікі, як сельская гаспадарка і харчаванне, транспарт і лагістыка, энергетыка, таксама маюць намер азнаёміцца з эканамічнымі магчымасцямі Беларусі. Прадстаўніцтвам нямецкай эканомікі ў Беларусі для прадпрымальнікаў з ФРГ будуць арганізаваныя перамовы ў беларускіх кампаніях.
У паведамленні для прэсы зазначаецца, што Платцэк выступае таксама за пашырэнне кантактаў у сферы грамадзянскай супольнасці. Запланавана яго наведванне школы № 43 у Мінску, якая з 1996 года падтрымлівае партнёрскія сувязі з гімназіяй Лізе‑Майтнер у Фалькензее. 20 вучняў з абодвух бакоў штогод наведваюць краіну школы‑партнёра ў межах праграмы школьных абменаў.
6 красавіка ў Мінскім міжнародным адукацыйным цэнтры імя Йаханеса Рау прэм’ер Брандэнбурга выступіць з дакладам аб рэгіянальным супрацоўніцтве ў Еўропе.
Платцэк ужо наведваў Мінск у кастрычніку 2007 года для ўдзелу ў дыспуце імя Й.Рау і правёў шэраг сустрэч з прадстаўнікамі ўладаў і грамадзянскай супольнасці.
Цяпер чытаюць
Якая логіка судоў за Гаюн? Мужчына, якога затрымлівалі па гэтай справе, апісаў убачанае6
Каментары