Колькасць подпісаў за Бабарыку ў прэзідэнты дасягнула 425 001. Гэта абсалютны рэкорд
Колькасць подпісаў за вылучэнне ў прэзідэнты Віктара Бабарыкі вырасла яшчэ на 40 тысяч і дасягнула 425 001.
Паведамленне пра гэта з'явілася на сайце прэтэндэнта.
Гэта рэкордная для альтэрнатыўнага кандыдата колькасць подпісаў. Раней максімум — 217 тысяч — сабраў у 1994-м, яшчэ на свабодных выбарах, Зянон Пазняк. У Аляксандра Мілінкевіча ў 2006-м было 198 тысяч. У Сямёна Домаша ў 2001-м — 164 тысячы.
Як паказаў шэраг апытанняў, менавіта банкір і мецэнат Віктар Бабарыка мог бы стаць фаварытам сумленных выбараў.
Бабарыка спрабуе выбудаваць шырокую антылукашэнкаўскую кааліцыю з удзелам самых розных сілаў. Яго кандыдатуру падтрымала таксама нобелеўская лаўрэатка Святлана Алексіевіч.
У апошні тыдзень Аляксандр Лукашэнка абрынуўся на Бабарыку з пагрозамі і абвінавачваннямі, не называючы яго, але ясна ўказваючы, пра каго гаворка. Гэта адбылося пасля таго, як стала ясна, што менавіта Бабарыка набірае рэкордную колькасць подпісаў выбарцаў.
Адначасова з нападкамі Аляксандра Лукашэнкі ад 11 чэрвеня ў кампаніях, звязаных з сябрамі Бабарыкі, прайшлі ператрусы і затрыманні.
«Рубікон пяройдзены», — сказаў у сувязі з гэтым Віктар Бабарыка.
18 чэрвеня сувязь з Віктарам Бабарыкам і ягоным сынам Эдуардам, які ўзначальвае яго ініцыятыўную групу, знікла. Як мяркуецца, яны знаходзяцца ў Дэпартаменце фінансавых расследаванняў Камітэта дзяржаўнага кантролю. Вядома, што ў доме Бабарыкі ў Лагойскім раёне праводзіцца ператрус.
Чытайце таксама: 425 001. Сумная гісторыя пра тое, што значыць гэта адзінка
Правакатарка, якая разгульвае па Брэсце з расійскім Z-сцягам — супрацоўніца Камітэта судовых экспертыз11
Каментары