На «падарункі» для прызёраў Алімпіяды і Паралімпіяды дзяржава патраціць больш за 900 тысяч даляраў
Грошы, згодна з загадам Лукашэнкі, выдаюцца за медалі. Акрамя таго, трэнерам дадуць ад 20% да 100% ад таго, што належыць спартоўцам.
Гэта значыць, што агульная сума можа быць нават большай, заўважае «Еўрарадыё».
Так, за золата Алімпіяды выплачваюцца грошы ў памеры 12 тысяч базавых (348 тысяч рублёў), за срэбра — 6 тысяч базавых велічынь (174 тысячы), за бронзу — 4 тысячы базавых велічынь (116 тысяч).
За Паралімпіяду меншыя сумы: 4 тысячы базавых, 2,4 тысячы і 1,6 тысячы адпаведна.
Тым не менш самыя вялікія прызавыя будуць у паралімпійца Ігара Бокія — 580 тысяч рублёў (або 230 тыс даляраў) за 5 залатых медалёў.
Трэба зазначыць, што вынікі Алімпіяды і Паралімпіяды ў гэтым годзе сталі горшымі ў гісторыі для Беларусі. На Алімпіядзе беларусы ўзялі сем медалёў (адзін залаты Івана Літвіновіча, тры сярэбраныя і тры бронзавыя).
З Паралімпіяды беларусы вязуць таксама сем медалёў: пяць залатых Ігара Бокія, а таксама срэбра плыўца Ягор Шалкунова і бронза Лізаветы Пятрэнкі ў кіданні кап'я.
Каментары