Жыхарка Паставаў хадзіла ў краму без маскі і ела прадукты, калі адмаўлялі ў абслугоўванні. Суд апраўдаў яе
выпадкі здарыліся 25, 26 і 29 верасня. Жанчына хадзіла ў краму перад закрыццём і ўпарта не надзявала маску. Калі ж на касе яе адмаўляліся абслугоўваць, яна на вачах у здзіўленых прадаўцоў ела прадукты і піла напіткі, пішуць «Народныя навіны Віцебска».
На жанчыну склалі пратаколы за адміністрацыйнае правапарушэнне, прадугледжанае артыкулам 11.3 КаАП — наўмыснае знішчэнне або пашкоджанне чужой маёмасці. Ёй інкрымінавалася нанясенне краме шкоды памерам 18 рублёў 53 капейкі ў першы вечар, 22 рублі 36 капеек у другі і 17 рублёў 39 капеек — у трэці.
На судзе жанчына заявіла, што ела прадукты з-за таго, што была галоднай, намеру пашкодзіць маёмасць не мела і хацела разлічыцца, але прадаўцы адмаўляліся яе абслугоўваць, бо не было маскі.
Тое, што пакупніца прасіла разлічыць, пацвердзілі і супрацоўнікі міліцыі, якіх выклікалі ў краму праз канфлікт.
У выніку пасля разгляду гэтай справы суд Пастаўскага раёна прыйшоў да высновы, што ў дзеяннях жанчыны няма складу адміністрацыйнага правапарушэння, прадугледжанага артыкулам 11.3 КаАП, бо ў яе не было прамога намеру на пашкоджанне маёмасці, і спыніў справу
Каментары