У 2019 годзе сталічныя ўлады ўпэўнена казалі пра запуск хуткаснага трамвая ў Мінску на працягу шасці-сямі гадоў. Быў нават пазначаны маршрут, па якім ён пойдзе — з Сухарава ў цэнтр (да вуліцы Клары Цэткін). Але сёння старшыня гарвыканкама заявіў, што гэты праект ужо не актуальны.
«Праект не знайшоў падтрымкі ў сталічнай улады, — цытуе старшыню Мінгарвыканкама Уладзіміра Кухарава інфармагенцтва «Мінск-Навіны». — Транспартнае пытанне закрыюць новымі станцыямі метро, электробусамі, тралейбусамі з аўтаномным ходам. Электратранспарт сёння ў сусветным трэндзе, і Мінск актыўна развівае гэты напрамак. Але трамвай не самае зручнае і эфектыўнае рашэнне, зыходзячы з выдаткаў. Перспектыўней развіваць электробусы. Іх у нас вырабляюць адразу два прадпрыемствы: МАЗ і «Белкамунмаш». Да канца года мы разлічваем атрымаць пад іх батарэі большай магутнасці беларускай вытворчасці».
Раней пад ідэю хуткаснага трамвая нават збіраліся перарабляць вуліцы Харкаўская, Панамарэнкі, Шаранговіча. Называліся і лічбы: на будаўніцтва кіламетра хуткасных трамвайных шляхоў нібыта патрабавалася 20 млн долараў у параўнанні з 80 млн за кіламетр метро. Але цяпер перамаглі нейкія іншыя разлікі.
Каментары