Супрацоўніцу расійскага «Першага канала» Марыну Аўсяннікаву аштрафавалі на 280 даляраў. Але гэта можа быць не ўсё
Рэдактарку «Першага канала» Марыну Аўсяннікаву, якая ўчора выйшла ў жывы эфір праграмы «Время» з антываенным плакатам, аштрафавалі на 30 тысяч рублёў па ч. 2 арт. 20. 2 КаАП (парушэнне ўстаноўленага парадку арганізацыі альбо правядзення сходу, мітынгу, дэманстрацыі, шэсця або пікетавання), паведамілі ў прэс-службе Астанкінскага суда.
Але гэта можа быць толькі пачаткам сапраўднага пераследу, бо крыніца ТАСС у праваахоўных органах паведамляла, што ў дачыненні да дзяўчыны таксама праводзіцца даследчая праверка на прадмет парушэння арт.207.3 КК (публічнае распаўсюджванне загадзя ілжывай інфармацыі аб выкарыстанні Узброеных сілаў Расіі).
Па гэтым артыкуле ёй можа пагражаць пакаранне ад штрафу ў памеры 700 тыс. руб. і больш да пазбаўлення волі на тэрмін ад трох да 15 гадоў.
Пакуль жа яе судзілі не за акцыю ў жывым эфіры, а за ролік з заклікамі выходзіць на антываенны мітынг.
У роліку, у якім Аўсяннікава тлумачыла свой учынак падчас вячэрніх навін, казалася:
«Мы, рускія людзі, якія думаюць і разумныя — толькі ў нашых сілах спыніць гэтае вар'яцтва. Выходзьце на мітынгі, нічога не бойцеся, яны не змогуць перасаджаць нас усіх».
Выйшаўшы з суда, Аўсяннікава зрабіла кароткі каментар для прэсы:
«Больш за 14 гадзін цягнуўся допыт. Мне не давалі звязацца з роднымі і блізкімі. Мне не аказвалі ніякай юрыдычнай дапамогі».
Адвакатам Аўсяннікавай у судзе быў беларус Антон Гашынскі, пазбаўлены ліцэнзіі ў Беларусі за абарону нашых палітвязняў.
Пасля журналістка заявіла, што не здзіўленая таму, што гэтым разам абышлося без арышту, бо ў яе ёсць двое дзяцей. А на пытанне, ці баіцца яна наступнага крымінальнага пераследу, адказваць не стала.
Каментары