«Стрэл быў проста ў галаву». Новыя падрабязнасці пра гібель вэтэрынара на мяжы з Украінай
9 траўня ў памежнай зоне, каля вёскі Верхнія Жары Брагінскага раёна, загінуў ветэрынарны лекар з Гомеля Сяргей Чамбровіч. Па папярэдняй інфармацыі, яго забілі стрэлам у галаву, даведалася новыя падрабязнасці гэтай справы «Радыё Свабода».
У 45-гадовага лекара засталіся жонка і двое сыноў. Усе, хто ведаў яго ў жыцці і па працы, кажуць пра яго выключна станоўча. «Добры, чуллівы, сціплы, нікому не адмаўляў у дапамозе», — кажуць жыхары Гомеля.
10 траўня лекара, аматара рыбалкі пахавалі ў вёсцы Раманавічы Гомельскага раёна. Афіцыйныя беларускія органы, міліцыя, Следчы і Памежны камітэт, дагэтуль не выказалі сваіх версій яго гібелі.
«Дакладна ніхто нічога пакуль не ведае. Паехаў з сябрам на рыбалку ў Брагінскі раён. Не ў першы раз, бо ён быў аматарам рыбалкі. Яны былі не на чаўнах — лавілі рыбу з берага. На іх там «напалі» — каля дзявятай раніцы 9 траўня. Хто напаў, як — невядома. Сяргею стрэлілі ў галаву. Сябар уцёк, схаваўся ў лесе і выклікаў ці памежнікаў, ці міліцыю. Жонка нават не была на апазнанні, бо там пашкоджаная галава — стрэл быў проста ў галаву. Хто страляў, адкуль, чаму — невядома», — расказала гамяльчанка, знаёмая сям’і.
«Гэта было 9 траўня. А да гэтага, 8 траўня, у Ніжніх Жарах, ніжэй па Дняпры, былі чутныя стрэлы. На наступны дзень пачалі казаць, што рыбака забілі ўзброеныя ўкраінцы», — расказала жыхарка Брагінскага раёна.
Ад Верхніх Жараў да Украіны — прыкладна паўтара кіламетра. Мяжа ідзе па Дняпры. З беларускага боку Лоеўскі і Брагінскі раёны ўвялі забарону на знаходжанне на рацэ на чаўнах. З украінскага боку ўведзеная забарона на знаходжанне грамадзян і замежнікаў на памежнай тэрыторыі — на кіламетр днём і 20 кіламетраў ноччу. Гэта не тычыцца мясцовых жыхароў.
Апроч таго, у шэрагу раёнаў Гомельскай вобласці (у тым ліку Брагінскім) забаронена наведваць лясы.
У Дзяржаўнай памежнай службе Украіны «Свабодзе» паведамілі, што не маюць ніякай інфармацыі пра гэты інцыдэнт.
«Нічога не магу сказаць пра гэтую сітуацыю, нашы падраздзяленні нічога падобнага не чулі», — сказаў супрацоўнік памежнай службы Андрэй Дземчанка.
Начальніца прэс-службы 105-га памежнага атрада Дзяржаўнай памежнай службы (Чарнігаў) Галіна Шахаўцова паведаміла «Свабодзе», што ўкраінскія памежнікі ў гэтым інцыдэнце не ўдзельнічалі.
«Там не было зафіксавана спробаў парушэння дзяржаўнай мяжы Украіны. Стрэлаў ніхто не чуў. Пра смерць рыбака мы ведаем толькі з СМІ», — сказала начальніца прэс-службы.
Чытайце таксама:
«Стралялі з украінскага боку». Што кажуць у памежнай вёсцы, дзе забілі беларускага рыбака
«Нічога не ведаю, ідзе следства». На мяжы з Украінай застрэлілі беларускага рыбака
-
Беларускі зняволены мала таго, што стрэс грошы з Расіі за ўмовы ўтрымання ў СІЗА, дык яшчэ і выбіў кампенсацыю за доўгае чаканне тых грошай
-
У цэнтры Мінска матацыкліст жорстка ўрэзаўся ў аўто — ажно пераляцеў машыну ВІДЭА
-
У Мюнхене беларус, украінец і немец у масках і са зброяй абрабавалі мінака. Ужо праз восем хвілін іх арыштавалі
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў3
Каментары