Поўныя нулі. Зборная Беларусі не здолела забіць нават камандзе Азербайджана
У чарговым матчы Лігі нацый галоўная футбольная каманда краіны зноў нічым не парадавала заўзятараў. Падначаленыя Георгія Кандрацьева без галоў разышліся мірам з азербайджанцамі — і апусціліся ў ніжнюю частку табліцы групы 3 дывізіёна «С».
Гэта ўжо не смешна.
У шасці апошніх афіцыйных гульнях нацыянальная дружына забіла толькі аднойчы — Уэльсу, падчас безнадзейнай паразы 1:5. У астатнім «белакрылыя» выглядалі максімальна бяззуба.
Прычым як у змаганнях з сур'ёзнымі апанентамі кшталту чэхаў альбо бельгіцаў, так і пры сустрэчах з зусім кволымі эстонцамі. Вечарам панядзелка беларусы мелі рэальны шанец палепшыць статыстыку, але хапнулі яшчэ больш сораму.
Гэтым разам калектыў Георгія Кандрацьева за 90 хвілін не здолеў скарыць візаві з Азербайджана. Каб зразумець, наколькі гэта дрэнна, дастаткова перагледзець вынікі супернікаў на міжнароднай арэне.
Адбор да чэмпіяната свету-2022 «парни из Баку» правялі ўвогуле без перамог — толькі раз пры васьмі спробах згулялі ўнічыю. У давесак жа двойчы (!) саступілі футбольным гігантам з Люксембурга.
Апошняя ж афіцыйная вікторыя Азербайджана датуецца вераснем 2020-га, калі ў бескампраміснай барацьбе быў пабіты Кіпр, 1:0.
І вось такому канкурэнту па групе 3 Лігі нацый «белакрылыя» шчодра падаравалі нічыйны бал. Прычынай таму — асцярожная тактычная схема ажно з пяццю абаронцамі ды агульная пасіўнасць каманды. Азербайджан больш валодаў мячом, часцей падыходзіў да брамы Паўла Паўлючэнкі і гуляў у тым тэмпе, што быў зручны менавіта пратакольным гасцям.
І калі напачатку двубоя нейкія намёкі на контргульню ў беларусаў яшчэ былі, то пасля перапынку падначаленыя Кандрацьева толькі напрыканцы тайма ўзгадалі пра існаванне чужой брамы.
Адзначым, што з 84-й хвіліны азербайджанцы ўвогуле гулялі ў меншасці з-за прамога выдалення Аліева. Аднак нават гэтая перавага не матывавала «белакрылых» даціснуць апанентаў.
Цікава, што ў паралельнай сустрэчы каманда Казахстана сенсацыйна адужала фаварытаў групы 3, славакаў, з мінімальнай розніцай. І дзякуючы поспеху 1:0 узначаліла пул, бо выбіла 6 ачкоў з 6 магчымых. Славакі другія — 3 ачкі, беларусы з азербайджанцамі замыкаюць квартэт — у кожнай каманды па ачку на рахунку.
Наступны матч каманда Кандрацьева правядзе 10 чэрвеня супраць зборнай Казахстана. Пачатак у 21.45.
Ці здасць Трамп Украіну Расіі? Чаму дэмакраты разгромленыя? Да чаго прывядзе кантроль рэспубліканцаў над выканаўчай і заканадаўчай уладай адначасова?8181
Каментары