З вальера ў Віцебскім раёне выпусцілі ў прыроду 40 высакародных аленяў
У Летчанскім лясніцтве Віцебскага лясгаса сёння мелі выпусціць на волю амаль 40 высакародных аленяў, паведаміла БелТА.
У лістападзе мінулага года ў Летчанскае лясніцтва ўпершыню завезлі 35 асобін высакароднага аленя. Сярод іх было 9 самцоў і 26 самак. Іх закупілі ў заводчыка ў Мёрскім раёне. Для замацавання на месцы маладому статку выдзелілі «жылплошчу», дзе аленям было камфортна і прасторна. Тут рагатых перасяленцаў перыядычна падкормлівалі збожжам і сенам. Кантакт з чалавекам імкнуліся мінімізаваць, каб алені не сталі ручнымі.
Сёння статак, які за гэты час папоўніўся трыма малымі аленянятамі, выпусцілі на волю.
Дарослыя і асабліва маладыя асобіны, якія прывыклі да гэтай мясцовасці, не адыдуць далёка ад новага арэала і маюць заняць сваю нішу ў мясцовай дзікай прыродзе. Для іх работнікі лясніцтва на зімовы перыяд установяць кармушкі і будуць перыядычна класці туды корм.
Усяго ў Віцебскай вобласці, паводле звестак вясновага ўліку, налічваецца 7,3 тыс. асобін высакароднага аленя, больш за 13,3 тыс. ласёў і 20,6 тыс. казуль.
Як расказаў вядучы інжынер па паляўнічай гаспадарцы Віцебскага дзяржаўнага вытворчага лесагаспадарчага аб’яднання Дзмітрый Дзіковіч, у паўночным рэгіёне ў перспектыве плануюць зраўняць пагалоўе аленяў і ласёў. Гэта дапаможа пашырыць відавую разнастайнасць жывёл у лясах Віцебшчыны і будзе садзейнічаць развіццю паляўнічага турызму.
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары
- Цягаем ланяў і польскіх конікаў, а нашых палескіх конікаў засталося менш за 100 асобін.... Ды і традыцыйная беларуская чырвоная карова, пра якую пісаў яшчэ Аркадзь Смоліч, можа знікнуць.
Было б добра па прыкладзе Брытаніі стварыць у нас аналаг RBST (Фонд абарыгенных пород Вялікабрытаніі) для захавання традыцыйных для Беларусі абарыгенных парод і іх унікальнага генатыпу.