«Людзі называюць нас рускімі тэрарыстамі». У Аўстрыі самаліквідуецца гурт Russkaja
На фоне вайны Расіі супраць Украіны папулярны аўстрыйскі гурт Russkaja абвясціў пра закрыццё праекта. Як адзначаецца ў заяве, апублікаванай на афіцыйнай старонцы гурта ў фэйсбуку 3 лютага, «вайна ва Украіне, распачатая Расіяй 24 лютага 2022 года, робіць немагчымым для нас працягваць падтрымліваць імідж і стыль, які сатырычна выкарыстоўвае савецкія сімвалы і мову», піша Deutsche Welle.
На думку музыкаў,
«гэтая вайна не спыніцца ў найбліжэйшы час, і нават калі б яна спынілася, савецкі вобраз і стыль апынуліся назаўжды табуяванымі».
Таксама выканаўцы заявілі, што асцерагаюцца за сваю бяспеку, бо:
«Людзі называюць нас рускімі тэрарыстамі і прарасійскімі, нават калі мы з'яўляемся поўнай супрацьлегласцю».
Гурт, у склад якога ўваходзяць шэсць мужчын і адна жанчына, быў заснаваны 18 гадоў таму аўстрыйскім музыкам і акцёрам руска-грузінскага паходжання Георгіем Макацарыя, які з 1989 года жыве ў Вене. У сваёй музыцы Russkaja сумяшчае элементы полькі, ска, фанфар, року і рускай народнай музыкі.
Пасля пачатку вайны ва Украіне калектыў перапісаў тэксты песень, у якіх звычайна змяшаныя руская, нямецкая і англійская мовы, публічна асудзіў агрэсію Расіі і падтрымаў Украіну. «Тое, што адбываецца цяпер, — гэта катастрофа, і мы асуджаем гэтую вар'яцкую вайну», — заявіў Георгій Макацарыя.
Каментары