У Бабруйску КДБ затрымаў 18-гадовага хлопца. Яго раздзелі і прымусілі аголеным расказваць пра сябе на відэа
Віна хлопца заключаецца ў тым, што ён сімпатызаваў Украіне.
Супрацоўнікі Камітэта дзяржаўнай бяспекі проста на вуліцы затрымалі 18-гадовага Арцёма Бярозкіна, паведамляюць праваабаронцы-вясноўцы.
Здарылася гэта ў рамках «зачысткі», якую загадаў правесці Аляксандр Лукашэнка.
Юнака паклалі на асфальт і прывезлі дамоў, дзе яго раздзелі і прымусілі аголеным, у адных трусах, застрашаным, расказваць на відэа, што ён стварыў тры каналы ў тэлеграме, дзе размяшчаў «экстрэмісцкія», нібыта, матэрыялы — да прыкладу, фатаграфіі ўкраінскіх вайскоўцаў.
Таксама яму ў віну ставяць створаны ў тыктоку акаунт, прысвечаны барацьбе Украіны супраць расійскай агрэсіі. Юнака вінавацяць і ў стварэнні чырвона-чорнага патча.
Відэа з хлопцам апублікавалі лукашэнкаўскія СМІ.
Аб працягу «комплекснай адпрацоўкі асоб, якія падтрымліваюць «антыдзяржаўныя погляды», паведаміла 17 сакавіка прэс-служба МУС. Толькі ГУБАЗіК штодзень праводзіць каля 20 ператрусаў. Загад пра зачыстку аддаў Аляксандр Лукашэнка, пасля таго, як падпольшчыкі з выкарыстаннем дронаў вывелі з ладу каштоўны расійскі самалёт, які базаваўся на аэрадроме ў Мачулішчах пад Мінскам і з дапамогай якога ракеты і дроны наводзіліся на цэлі ва Украіне. Адказнасць за гэтую дыверсію ўзяла на сябе ініцыятыва сілавікоў супраць дыктатуры «Байпол».
Масавыя палітычныя рэпрэсіі ў Беларусі працягваюцца з 2020 года, калі Аляксандр Лукашэнка, мяркуючы па звестках з участкаў, дзе выбарчыя камісіі дазволілі назіральнікам сачыць за падлікам галасоў, прайграў Святлане Ціханоўскай, але не аддаў уладу. З 2022 года, пасля нападу Расіі на Украіну, беларусаў пачалі праследаваць таксама за антываенныя выказванні або за сімпатыі да Украіны, якая змагаецца за незалежнасць і тэрытарыяльную цэласнасць. За гэты час у краіне адбылося каля 50 тысяч палітычна матываваных затрыманняў, заведзена каля 12 тысяч палітычна-крымінальных спраў і адкінутыя базавыя нормы законнасці і маралі.
«Фемінізм у маім выпадку перамог». Вераніка Станкевіч — пра дапамогу палітвязням у «Вольных» і планы на вяселле з Івуліным24
Каментары