Святлана Ціханоўская выступіла на Парламенцкай асамблеі НАТА ў майцы з партрэтам мужа і жоўтай біркай, якую прымушаюць насіць палітвязняў. У дыскусіі аб лёсе Беларусі падчас вайны ўдзельнічалі парламентарыі з больш чым 40 краін, паведамляе Офіс палітыка.
Ціханоўская нагадала пра сённяшні Дзень салідарнасці з беларускімі палітвязнямі, заклікала дэпутатаў падтрымаць палітычных зняволеных у Беларусі.
Яна распавяла пра сітуацыю з Бабарыкам, Бяляцкім, Ціханоўскім, папрасіла аб дапамозе беларускім добраахвотнікам, якія ваююць ва Украіне, нагадала пра сувязь Беларусі і Украіны, неабходнасць падтрымліваць тых, хто змагаецца ў абедзвюх краінах.
Таксама Ціханоўская ўзняла праблему размяшчэння ядзернай зброі ў Беларусі як пагрозы не толькі незалежнасці краіны, але і бяспецы ў рэгіёне, заклікала дэпутатаў гэтага не дапусціць.
Яна заклікала прымаць меры і для прыцягнення рэжыму да адказнасці за выкраданне ўкраінскіх дзяцей і вывазу іх на беларускую тэрыторыю.
Ціханоўская распавяла пра неабходнасць умацоўваць міжнародную прысутнасць дэмакратычных сілаў і дэлегімітызаваць рэжым Лукашэнкі там, дзе гэта магчыма.
Пры канцы выступу лідарка дэмакратычных сіл выказала надзею на тое, што Беларусь будзе надзейным партнёрам Еўрасаюза і краін НАТА, будзе выконваць свае абавязальніцтвы і не несці пагрозы.
Ціханоўская прэзентавала пяцікрокавы план вываду краіны з-пад залежнасці Расіі. У тым ліку, ён прадугледжвае выхад Беларусі з Саюзнай дзяржавы, АДКБ і супрацоўніцтва з еўрапейскімі структурамі і міжнароднымі арганізацыямі, у прыватнасці, уступленне ў Раду Еўропы.
Гэта першы выступ Ціханоўскай на ПА НАТА.
Цяпер чытаюць
«Яна даўнавата ў Беларусі». Бацька Анжалікі Мельнікавай прызнаўся, што яна жывая і здаровая113
Каментары