У абломках «Тытаніка» знайшлі каралі з зубам мегаладона — гіганцкай старажытнай акулы
Сярод абломкаў вядомага патанулага карабля знайшлі вельмі незвычайнае ўпрыгожанне.
На патанулым «Тытаніку» даследчыкі выявілі вельмі незвычайнае ўпрыгожанне — залатыя каралі з зубам мегаладона, велізарнай старажытнай акулы. Пра гэта пісала выданне The Times са спасылкай на даследаванне кампаніі Magellan.
Каманда навукоўцаў з Magellan займаецца сканаваннем «Тытаніка» ўжо доўгі час. У мінулым годзе іх падводныя апараты правялі на дне каля 200 гадзін і зрабілі 700 тысяч фотаздымкаў лайнера для 3D-рэканструкцыі. Якраз пасля стварэння адной з 3D-мадэляў абломкаў лайнера і былі знойдзеныя незвычайныя каралі з зубам мегаладона.
Зуб гіганцкай акулы ў залатым упрыгожанні быў знойдзены сярод іншых рэчаў, падобных да пацерак. На думку даследчыкаў, гэта ўсё ўваходзіла ў калекцыю аднаго з пасажыраў першага класа. На жаль, згодна з заканадаўствам Вялікабрытаніі і ЗША, падымаць артэфакты з патанулага карабля забаронена. Цяпер уладальніка караляў плануюць знайсці пры дапамозе штучнага інтэлекту, які вывучыць усе фатаграфіі з гэтым меркаваным пасажырам.
«Мы знайшлі зуб мегаладона, які зроблены ў выглядзе караляў. Гэта неймаверна. Гэта абсалютна неймаверна», — падзяліўся Рычард Паркінсан, дырэктар кампаніі Magellan, ахарактарызаваўшы знаходку як нешта «дзіўнае, прыгожае і захапляльнае».
У той жа час іншыя навукоўцы пакуль не могуць сказаць дакладна, ці быў гэта сапраўды зуб мегаладона альбо зуб іншай сучаснай акулы. Аднак цалкам імаверна, што гэта сапраўдныя рэшткі гіганцкай акулы, якая знікла каля 3,6 мільёна гадоў таму.
Цяпер чытаюць
«Запускайце далей салюты, а я выклічу міліцыю». Беларусы спрачаюцца пра забарону на феерверкі8
Каментары