Каменданту сумнавядомай данецкай турмы «Ізаляцыя» далі 15 гадоў турмы
Шаўчэнкаўскі раённы суд Кіева абвясціў прысуд Дзянісу Кулікоўскаму — каменданту данецкай турмы «Ізаляцыя», дзе незаконна ўтрымлівалі і катавалі ўкраінскіх цывільных і ваеннапалонных.
Суд прызначыў яму пакаранне ў выглядзе 15 гадоў, задаволіў просьбу пракуратуры, паведамляюць Ґрати.
Суддзя Яўген Мартынаў, які разглядаў гэтую справу, прызнаў Кулікоўскага вінаватым у чатырох злачынствах: жорсткім абыходжанні з ваеннапалоннымі, удзеле ў тэрарыстычнай арганізацыі і незаконным узброеным фармаванні. Але апраўдаў па недаказанасці абвінавачвання ў гандлі людзьмі.
Суд таксама задаволіў два грамадзянскія пазовы. Кулікоўскі павінен выплаціць 400 тысяч (10 тысяч даляраў) і 95 тысяч (2600 даляраў) двум пацярпелым.
Сам падсудны віны не прызнаў. Справу слухалі ў закрытым рэжыме.
Супраць Кулікоўскага далі паказанні былыя палонныя «Ізаляцыі» — 22 чалавекі прызнаныя па справе пацярпелымі. Сярод іх — пісьменнік і журналіст Станіслаў Асееў, якога ў 2017 годзе затрымалі ў «ДНР» і кінулі ў «Ізаляцыю», абвінаваціўшы ў шпіянажы, стварэнні экстрэмісцкай арганізацыі і публічных закліках да дзеянняў, «накіраваных на парушэнне тэрытарыяльнай цэласнасці».
Служба бяспекі Украіны затрымала Кулікоўскага ў 2021 годзе. Расследаванне яго справы скончылася ў чэрвені 2022.
«Ізаляцыя» — гэта расійскія засценкі на месцы былога завода ізаляцыйных матэрыялаў, дзе да 2014 года працавала арт-прастора «Ізаляцыя».
Каментары