У канцы красавіка ў горадзе Тода прайшоў адкрыты чэмпіянат Японіі па киёкушынкай каратэ. Там спаборнічалі спартоўцы з 19 краін, у тым ліку двое беларусаў: Аляксандр Гузнёнак і Радамір Агееў.
Абодва гамельчукі трэніруюцца ў цэнтры ўсходніх адзінаборстваў. Аляксандр Гузнёнак з Японіі вярнуўся з чэмпіёнскім кубкам, піша belkagomel.by
Аляксандру — 44 гады. Ён працуе вытворцам работ на Гомельскім домабудаўнічым камбінаце. Займаецца дахам на самых розных будоўлях у горадзе. Калі падыдзе тэрмін, прымецца і за дах першага гомельскага гмаху на 24 паверхі.
Пасля змен тройчы на тыдзень Аляксандр прыходзіць у залу для каратэ. Двухгадзінныя трэніроўкі па каратэ — гэта не зусім хобі, хутчэй, стыль жыцця.
— Я займаюся кіёкушынкай каратэ з 1992 года. Спачатку гэта была падлеткавая нейкая мода на ўсходнія адзінаборствы, але з узростам стаў ставіцца да захаплення ўсё больш сур'ёзна. Цяпер цяжка ўявіць жыццё без спорту, — назваў плюсы Аляксандр.
Разам з выхаванцамі Гомельскага цэнтра ўсходніх адзінаборстваў каратыст перыядычна выязджае на спаборніцтвы ў розныя гарады Беларусі, Расіі, Венгрыі, Балгарыі. У лістападзе 2023-га, напрыклад, ён выступаў на чэмпіянаце свету ў Казахстане.
— Беларусы тады паказалі сябе нядрэнна: узялі прызавыя месцы ў трох вагавых катэгорыях. Але мне не пашанцавала. Прайграў бойку ў адборы ў паўфінал і адразу вылецеў з турнірнай табліцы. Гэта самае крыўднае, — успомніў няўдалы выступ Гузнёнак. — У Японію я ехаў за рэваншам.
Адкрыты чэмпіянат Японіі праходзіў два дні. Спачатку спартсмены змагаліся ў базавай тэхніцы вядзення бою. У гэтай дысцыпліне каратысты выступаюць у адзіночку, бо галоўная задача тут не перамагчы візаві, а паказаць дакладнасць рухаў і бліскучую каардынацыю. У гэтым відзе Беларусь прадстаўляў Радамір Агееў.
У другі дзень у баявых паядынках — кумітэ — змагаўся Аляксандр Гузнёнак. Ён выступаў у абсалютнай вагавой катэгорыі сярод ветэранаў. Каратыст выходзіў на татамі тройчы: супраць аднаго спартсмена з Амерыкі і двух з Японіі. Кожны раз атрымоўвалася зарабіць балаў больш, чым у суперніка.
— Адолець амерыканца было адносна проста, а вось з японцамі барацьба за балы ішла напружаная. Саступіць апаненту ў сябе дома для іх было трагедыяй. Падчас юніёрскіх выступленняў нават назіраў такую карціну, што ў выпадку пройгрышу японскія спартсмены плакалі. Дарэчы, іх трэнеры адзначылі волю да перамогі спартсменаў з СНД. Была такая фраза, што яны нясуць традыцыі японскага каратэ, але будуць імкнуцца да стойкасці і сіле духу.
У сваёй катэгорыі Аляксандр стаў чэмпіёнам. На гэтых жа спаборніцтвах ён атрымаў другую залатую палоску на чорны пояс.
— Прайшоў атэстацыю на другі дан (ступені майстэрства, усяго іх 10). Чорны пояс я атрымаў у 2018 годзе, а да гэтага гадоў 12 хадзіў з карычневым. Не таму, што не хапала майстэрства, проста не даходзілі рукі з'ездзіць і прайсці кваліфікацыю.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары
https://nashaniva.com/343404