US Open у разгар чэмпіянату прыбраў беларускі сцяг са старонкі Арыны Сабаленкі
Нягледзячы на забарону дзяржаўнай сімволікі Беларусі і Расіі на турнірах Вялікага шлема, ва ўнутранай сістэме чэмпіянату US Open зноў з'явіліся сцягі двух краін. На гэта звярнуў увагу таблоід Bild.
Кіраўніцтва US Open прыбрала сцягі Расіі і Беларусі пасля скаргі журналіста Bild, які заўважыў іх ва ўнутранай сістэме Асацыяцыі тэніса ЗША (USTA).
На гэтым тыдні ў Нью-Ёрку стартаваў чарговы адкрыты чэмпіянат ЗША па тэнісе US Open — адзін з чатырох турніраў Вялікага шлема. Пасля 24 лютага 2022 года там адмовіліся ад дзяржаўнай сімволікі Расіі і Беларусі. Але цяпер беларускі сцяг зноў з'явіўся на старонцы Арыны Сабаленкі, а расійскі трыкалор — на старонках Данііла Мядзведзева і Андрэя Рублёва. Сцягі таксама сталі даступны ў сістэме ў пошуку па словах «Расія» або «Беларусь».
На гэта звярнуў увагу адзін з карэспандэнтаў нямецкага таблоіда Bild, які потым звярнуўся з запытам у USTA. Асацыяцыя неадкладна выдаліла дзяржсімволіку Беларусі і Расіі з унутранай сістэмы і патлумачыла казус «памылкай супрацоўніка, які загрузіў у сістэму састарэлы файл».
Усяго ў адзіночным разрадзе цяперашняга турніру US Open гуляюць тры беларусы і 17 расіян.
Каментары
Беларускі - гэта бел-чырвона-белы сцяг, пад якім беларусы 100 гадоў ішлі да сваёй краіны. А чырвона-зялёны - антыбеларускі, пад якім беларусаў катуюць і пад якім краіну Беларусь зноў цягнуць у расію.
Заўжды трыгерыць, калі медыі, магчыма, самі таго не разумеючы, прасоўваюць ябацькаўскія наратывы праз выразы "беларускія сілавікі", "беларускі сцяг", "беларускія ўлады" і г.д., датычна ўсяго антыбеларускага. Ну можна ж хаця б пісаць "улады Беларусі", "сцяг дзяржапарату Беларусі".