Вершы расстраляных у 1937-м паэтаў прагучаць у фармаце спектакля-канцэрта
Рэжысёрка Жэня Давідзенка паставіла новы спектакль «Расстраляныя», які нагадвае пра беларускіх паэтаў, што сталі ахвярамі сталінскіх рэпрэсій і жыццё якіх абарвалася ў страшную ноч з 29 на 30 кастрычніка 1937 года.
Музыку да вершаў паэтаў дзяўчына стварала разам са свежасабраным гуртом, а візуалізацыю для спектакля і партрэты забітых творцаў зрабіла мастачка Анастасія Рыдлеўская. Анімацыю стварала Аляксандра Бабкова.
«Я ведала пра тое, як у 30-я працавала рэпрэсіўная машына, але толькі недзе гадоў пяць таму глыбей пагрузілася ў падзеі «чорнай ночы». І мяне моцна штурханула гісторыя гэтага забівання культуры, што актуальна і па сёння. На жаль, мы ўсё яшчэ жывем у такі час, дзе існуюць забойствы людзей і адбіранне ў іх магчымасці выказвацца. Мяне як рэжысёрку гэта моцна клапоціць, — дзеліцца Жэня Давідзенка. — І як у рэжысёркі ў мяне ёсць магчымасць даць людзям, у якіх адабралі словы (не кажучы пра жыццё), зноў загучаць».
Форма канцэрта была абраная рэжысёркай як найбольш прыдатная і ёмістая для гучання са сцэны вершаў.
«Я яшчэ калі вучылася ў школе, то ўсе вершы вучыла, складваючы іх у песенькі», — кажа аўтарка.
Пад свае задачы яна сабрала новую музычную групу з бас-гітарыста (Андрэй Скуніцкі), піяністкі (Вольга Гаховіч) і бубначкі (Марыя Піньчук). Вакальныя партыі будзе выконваць сама Жэня Давідзенка, а дадатковыя гістарычныя ўрэзкі і дэталі прагучаць галасамі сям’і акцёраў Наталлі і Андрэя Бібікавых.
«Увесь гэты праект стаў магчымым, дзякуючы таму, што гэтыя людзі за бясплатна пагадзіліся са мной эксперыментаваць. Мы ўсе зліліся ў энергіі ўзаемаразумення, з жаданнем, каб гэты матэрыял прагучаў са сцэны. Таксама нас падтрымаў «Тэатр Atelier», даўшы пляцоўку. Людзі — гэта найлепшая падтрымка».
Спектакль быў сабраны камандай за два месяцы. Паказ, які адбудзецца на беларускай мове з польскімі субтытрамі, запланаваны на 31 кастрычніка ў Сопаце. Але тых, хто не мае магчымасці пабачыць спектакль жыўцом, у будучыні чакае відэаверсія, а таксама асобны альбом з запісанымі песнямі на музычных пляцоўках.
«У наступным годзе я б хацела зрабіць з гэтага яшчэ больш поўнамаштабны спектакль у плане дэкарацый і існавання акцёраў, бо пакуль яны проста праваднікі ў гісторыю», — дзеліцца планамі рэжысёрка.
Жэня Давідзенка — выпускніца Беларускай дзяржаўнай акадэміі мастацтваў, рэжысёрка, акцёрка, спявачка. Працавала ў Цэнтры беларускай драматургіі. На яе рахунку — каля 25 чытак і 8 спектакляў. Сярод апошніх прац — пастаноўка «Да дому наўпрост 10 гадзін язды» (гісторыя трох дзяўчат-імігрантак, якія выпадкова сустракаюцца на пляжы ў Гданьску), візуальна-музычны спектакль «Хрыбет», які можна паслухаць на ютубе I Spotify.
Падтрымка, якую ў Польшчы вылучалі і беларускім тэатрам, стала даступнай толькі ўкраінцам? Разабраліся, што адбываецца і як жыве незалежны тэатр за мяжой
Акцёры, якія гралі ў РТБД і Вялікім тэатры, з партнёрамі ствараюць у Варшаве кафэ-кам'юніці — наведаліся да іх у госці
Мюзікл, трылер ці проста доўгі кліп Лэдзі Гага: якім атрымаўся новы «Джокер»
Бондарава абрынулася на музей Янкі Купалы і мастака Сушу31
Каментары