Рэдкае нябеснае відовішча: адразу ўсе сем планет стануць на гэтым тыдні ў адну лінію
На гэтым тыдні аматараў назіранняў за космасам чакае незабыўнае відовішча: усе сем планет — Марс, Юпітэр, Уран, Венера, Нептун, Меркурый і Сатурн — на працягу кароткага перыяду будуць бачныя на вячэрнім небасхіле Зямлі, піша Бі-бі-сі.
Гэтая з’ява вядомая як парад планет — калі некалькі планет выстройваюцца блізка адна да адной, ствараючы з Зямлі ілюзію, што яны стаяць у адзін шэраг.
Наступны раз такое спрыяльнае размяшчэнне сямі планет адбудзецца толькі ў 2040 годзе.
Лепш за ўсё ўбачыць максімальную колькасць планет можна будзе адразу пасля заходу сонца ў сераду, чацвер і пятніцу на гэтым тыдні.
Чатыры планеты — Меркурый, Венера, Юпітэр і Марс — будуць бачныя няўзброеным вокам. З Сатурнам будзе складаней, бо ён знаходзіцца нізка над гарызонтам. Каб разгледзець дзве іншыя планеты, Уран і Нептун, спатрэбіцца тэлескоп.
Калі маецца добры агляд гарызонту і яснае неба, шанцы ўбачыць усе сем планет павялічваюцца. Аднак гэтая магчымасць будзе вельмі кароткай.
З заходам Сонца Сатурн і Меркурый таксама будуць заходзіць, што зробіць іх асабліва цяжкадаступнымі для назірання.
«У вас будзе ўсяго некалькі хвілін пасля заходу сонца, каб убачыць іх, перш чым яны схаваюцца за гарызонт. Пасля гэтага вы яшчэ доўга зможаце выразна бачыць Венеру, Юпітэр і Марс», — распавёў астраном з Каралеўскай абсерваторыі ў Грынвічы Эдвард Блумер.
Планеты нашай Сонечнай сістэмы круцяцца вакол Сонца прыкладна ў той жа плоскасці, што і Зямля, але з рознай хуткасцю і на рознай адлегласці. Часам здаецца, што яны выстройваюцца ў адну лінію, ствараючы для назіральнікаў на Зямлі захапляльнае відовішча. Пры гэтым планеты ўсё роўна застаюцца падзеленымі велізарнымі касмічнымі адлегласцямі.
Венеру і Юпітэр будзе лягчэй за ўсё заўважыць дзякуючы іх яркасці, а Марс будзе мець выразнае чырванаватае адценне.
«Уран тэхнічна можна ўбачыць няўзброеным вокам, але для гэтага спатрэбіцца ідэальны зрок і ідэальныя ўмовы», — тлумачыць Эдвард Блумер.
Каб павялічыць шанцы ўбачыць як мага больш планет, астраном раіць выбіраць месца з адкрытым гарызонтам і мінімальным светлавым забруджваннем.
«Калі вы проста выйдзеце ў двор, вам спатрэбіцца час, каб прывыкнуць да ўзроўню асветленасці. Дайце сабе крыху часу — вашым вачам трэба каля паўгадзіны, каб цалкам адаптавацца, — кажа доктар Блумер. — Не глядзіце ў тэлефон і пераканайцеся, што ў вас ёсць свабодны агляд гарызонту».
Каментары