На мяжы Мінскай і Брэсцкай абласцей на трасе М-1 каля фігуры гіганцкага зубра хочуць пабудаваць кафэ. Як піша БелТА, працоўная назва праекта — «Крылы дружбы». З ідэяй выступіў Брэсцкі аблвыканкам.
Паводле слоў старшыні камітэта па архітэктуры і будаўніцтве Брэсцкага аблвыканкама Андрэя Слуцкага, фігура зубра ўжо з’яўляецца кропкай прыцягнення. Людзі тут часта спыняюцца для фотасесій і адпачынку.
— Само сабой, напрошваецца месца, дзе можна было б і перакусіць, гарбаты, кавы папіць, — разважае Андрэй Слуцкі.
Каля зубра таксама сустракаюць дэлегацыі, якія накіроўваюцца ў Брэсцкую вобласць.
Паводле слоў чыноўніка, праектныя інстытуты ўжо прапанавалі некалькі варыянтаў дызайну аб’екта і схему размяшчэння. У ім будуць выкарыстоўвацца камень, шкло і прыродныя матэрыялы. Працоўная назва — «Крылы дружбы». Тэрміны з’яўлення аб’екта пакуль не называюцца.
— Будзем выходзіць у найбліжэйшы час на дагаворныя адносіны і будаваць гэтае кафэ, — удакладніў Андрэй Слуцкі.
Каментары